नेपाली सिनेमाघरहरूमा बिहीबारदेखि दुई ठूला भारतीय फिल्महरू एकसाथ प्रदर्शनमा आएका छन्। बलिउडको एक्सन थ्रिलर 'वार २' र तमिलको 'कुली' एकैसाथ रिलिज भएका हुन्।
नेपालमा पहिलो दिनको लागि 'कुली' ले भन्दा 'वार २' ले बढी शो पाएको छ। दुवै भारतीय फिल्मले राम्रो संख्यामा शो ओगटेका छन्, जसले प्रदर्शनरत नेपाली फिल्महरूलाई भने असर परेको देखिन्छ।
भारतीय फिल्म नेपालमा आएसँगै गत हप्तादेखि प्रदर्शनरत नेपाली फिल्म 'मोहर' र 'सिटामोल' को शो संख्यामा गिरावट आएको छ। दुवै नेपाली फिल्मको शो संख्या खुम्चिएको हो। दुवै नेपाली फिल्मलाई दर्शकले सकारात्मक प्रतिक्रिया दिइरहेका छन्।
नेपालमा 'वार २' ले बढी शो पाए पनि भारतमा भने 'कुली' को क्रेज बढी देखिएको छ। बक्स अफिस विश्लेषकहरूका अनुसार, 'कुली' ले विश्वव्यापी अग्रिम बुकिङमा 'वार २' लाई पछाडि पारेको छ।
अयान मुखर्जीद्वारा निर्देशित 'वार २' मा ऋतिक रोशन, जुनियर एनटीआर र कियारा आडवाणीको मुख्य भूमिका रहेको छ। यो फिल्म सन् २०१९ को सफल फिल्म ‘वार’ को सिक्वेल हो। यसै फिल्मबाट दक्षिण भारतीय सुपरस्टार जुनियर एनटीआरले हिन्दी फिल्ममा डेब्यु गरेका छन्।
त्यस्तै, लोकेश कनागराजद्वारा निर्देशित ‘कुली’ एक ग्याङ्स्टर ड्रामा हो, जसमा दक्षिण भारतका सुपरस्टार रजनीकान्त मुख्य भूमिकामा छन्।
फिल्ममा आमिर खान, नागार्जुन, श्रुति हासन जस्ता अन्य चर्चित कलाकारहरूको पनि अभिनय छ।
यसअघि रिलिज अन्य भारतीय फिल्महरू पनि नेपाली हलमा प्रदर्शनरत छन्।
-1746009348.jpg)
