भारतीय फिल्म उद्योगमा आजकल पुराना क्लासिक फिल्महरू पुनः प्रदर्शन गर्ने लहर चलेको छ।
यो ट्रेन्डले पुराना हिटदेखि फ्लपसम्मका फिल्मलाई हलमा नयाँ जीवन दिइरहेको छ। 'शोले' र 'मुगल–ए–आजम' जस्ता सदाबहार फिल्महरू दर्जनौं पटक पुनः प्रदर्शन भएका छन्।
तर एउटा कन्नड ग्याङ्स्टर फिल्म छ, जसले ती सबै फिल्मलाई पुनः प्रदर्शनमा पछाडि पारेको छ।
फिल्म हो- ऊँ (ओम) । हिन्दुस्तान टाइम्सका अनुसार यो फिल्मले अहिलेसम्म आश्चर्यजनक ५५० पटक पुनः प्रदर्शनका साथ रेकर्ड राख्न सफल छ।
उपेन्द्रको लेखन तथा निर्देशनमा बनेको 'ऊँ' सन् १९५५ मा सार्वजनिक भएको थियो। यसमा शिव राजकुमार र प्रेमा मुख्य भूमिकामा छन्। बैंगलोरको आपराधिक दुनियाको कथा यसले प्रस्तुत गर्छ।
यो फिल्म मात्र ७५ लाख भारूको बजेटमा बनेको थियो। फिल्मले बक्स अफिसमा बजेटभन्दा कयौं गुणा बढी कमाइ गर्दै ब्लकबस्टर साबित भयो।
फिल्मले यति धेरै लोकप्रियता कमायो कि हलबाट उत्रिने बित्तिकै दर्शकहरूले यसलाई फेरि प्रदर्शन गर्न माग गर्थे। यही मागका कारण फिल्म हरेक दुई हप्तामा पुनः प्रदर्शन हुन थाल्यो।
'ऊँ' ले लिम्का बुक अफ रेकर्डस्मा सबभन्दा धेरै पटक पुनः प्रदर्शन भएको भारतीय फिल्मको रूपमा आफ्नो नाम दर्ता गराएको छ। फिल्म पछिल्लो ३० वर्षमा ५५० पटक पुनः प्रदर्शन भइसकेको छ, जुन भारतीय फिल्मको इतिहासमा एउटा कीर्तिमान हो। बैंङलुरूको 'कपाली सिनेमा' हलमा मात्रै यो फिल्म ३० पटक पुनः प्रदर्शन भएको जनाइएको छ।
'ऊँ' आफ्नो समयको सबभन्दा सफल मात्र नभई सबैभन्दा प्रभावशाली कन्नड फिल्म पनि हो। फिल्मले त्यसबेलाका सफल स्टार शिव राजकुमारलाई ९० को दशकको अन्त्यतिर उद्योगको नम्बर एक अभिनेता बनायो।
निर्देशक उपेन्द्रका लागि पनि 'ऊँ' कोशेढुंगा साबित भयो। उनको यो तेस्रो फिल्म थियो, तर यसैबाट उनी एक स्थापित निर्देशक बनेका थिए। केही वर्षपछि उनले अभिनयमा पनि सफल पाइला चाले।
'ऊँ' को सफलता यति चुलियो कि पछि यसलाई हिन्दीमा 'अर्जुन पण्डित', तेलुगुमा 'ओमकारम' र बंगालीमा 'पन्जा' नामले रिमेक समेत गरियो।
-1742801159.jpg)
-1746009348.jpg)
