रजनीकान्त अभिनीत 'कुली' चौथो सर्वाधिक कमाइ गर्ने तमिल फिल्म बनेको छ। लोकेश कनागराज निर्देशित यो फिल्मको विश्वव्यापी कमाइ ५ सय करोड भारू नजिक पुगेको छ।
प्रदर्शनको ११ दिनमा फिल्मले भारतमा ३ सय ४ करोड भारू कुल कमाइ गरेको छ। भारतबाहिर फिल्मले १ सय ८० करोड कमाउँदा विश्वव्यापी कमाइ ४ सय ८४ करोड भारू पुगेको भारतीय संचारमाध्यमले जनाएका छन्। फिल्मले आइतबारसम्ममा उक्त कमाइ गरेको हो।
त्यस्तै, एकसाथ रिलिज अर्को फिल्म 'वार २' को विश्वव्यापी कमाइ ३ सय ५० करोड नजिक पुगेको छ। ऋतिक रोशन र जुनियर एनटीआर अभिनित फिल्मले ११ दिनमा विश्वव्यापी रूपमा ३ सय ३९ करोड भारू कमाइ गरेको हो।
फिल्मले घरेलु बजारमा कुल २ सय ६४ करोड भारू कमाएको छ भने भारतबाहिर ७५ करोड भारू कमाइ गरेको जनाइएको छ।
योसँगै 'वार २' ले बक्स अफिसमा 'ठग्स अफ हिन्दुस्तान' को कमाइलाई उछिनेको छ। सन् २०१८ मा रिलिज उक्त फिल्मले ३ सय ३५ करोड भारू कमाएको थियो।
'कुली' र 'वार २' को विश्वव्यापी कमाइमा १ सय ४५ करोडको अन्तर छ।
'कुली' को कुरा गर्नुपर्दा यो एक एक्सन थ्रिलर फिल्म हो। यसमा रजनीकान्तसहित नागार्जुन, श्रुति हासन, सौबिन शाहीर, उपेन्द्र र आमिर खान पनि विशेष भूमिकामा छन्।
त्यस्तै, 'वार २' एक जासूसी एक्सन थ्रिलर फिल्म हो। यसमा ऋतिक रोशन र जुनियर एनटीआरसहित कियारा आडवाणी शीर्ष भूमिकामा छिन्। दुवै फिल्म नेपालका सिनेमा हलमा पनि प्रदर्शनरत छन्।
-1756118929.jpeg)
-1746009348.jpg)
