राष्ट्रिय आधारभूत विद्यालय पैरेनीका प्रधानाध्यापक दानबहादुर गुरुङ सेवा निवृत्त हुन ४ वर्ष मात्रै बाँकी थियो। उनलाई लाग्यो एउटामात्रै विद्यालयको नभएर गाउँपालिकाका सबै विद्यालयका लागि आफ्नो जरूरी छ। शिक्षक संगठन हुँदै मुलधारको राजनीतिको स्वाद चाखिरहेका गुरूङले शिक्षकबाट राजीनामा दिने निर्णय गरे। लगत्तै नेकपा एमालेले उनलाई चितवनको एक मात्र गाउँपालिका इच्छाकामनाको अध्यक्षको उम्मेदवार बनाउने निर्णय गर्यो।
उनले इच्छाकामना-६ स्थित राष्ट्रिय आधारभूत विद्यालय पैरेनीमा २०५२ सालबाट पढाउन थालेका थिए। उनी २०६३ सालमा स्थायी भएका थिए।
इच्छाकामना-६ याक्राङमा २०२८ सालमा जन्मिएका गुरूङ चार पटकसम्म नेकपा एमालेको जिल्ला समिति सदस्य भए। उनी हाल पार्टीको इच्छाकामना गाउँपालिकाका इन्चार्ज हुन्। उनी नेपाल राष्ट्रिय शिक्षक संगठनका पूर्वजिल्ला अध्यक्ष हुन्।
‘म जनताको सेवक बनेर शिक्षा, स्वास्थ्य, विपन्न वर्गको जीवनस्तर सुधार्ने काममा सक्रिय हुन चाहन्छु। त्यसैले मैले सक्रिय राजनीतिमा आउन शिक्षकबाट राजीनामा दिएँ,’ गुरूङले सेतोपाटीसँग भने।
गुरूङले गाउँपालिकाको अध्यक्षमा विजयी भए सबैभन्दा पहिले शिक्षाका समस्या समाधानमा लाग्ने बताए। चेतनाको अभावका कारण बाल मजदुर बढेको, प्राथमिक विद्यालयमा पनि सबैको पहुँच नभएको उल्लेख गर्दै उनले सबै बालबालिकाले पढ्न पाउने व्यवस्था मिलाउने बताए। उनले बाल मजदुरको संख्यालाई शून्यमा झार्ने बताए।
उनले इच्छाकामना किसानलाई शिक्षासँग जोडेर उत्पादन बढाउने कार्यक्रम ल्याउने बताए। स्थानीयलाई कृषिमा आत्मनिर्भर बन्न प्रेरित गरिने उनले बताए।
गुरूङको योजना गरिबीको रेखामूनि रहेका चेपाङ, दलित समुदायको जीवनस्तर उकास्ने खालका कार्यक्रम ल्याउने, मेयर आवास कार्यक्रम सञ्चालन गरी बासस्थानको व्यवस्था गर्ने, सुकुम्बासीलाई व्यवस्थित गर्न लालपुर्जा वितरण गर्ने, इच्छाकामनाका धार्मिक तथा पर्यटकीय क्षेत्रको प्रवर्द्धन गर्ने, सडक सञ्जालको बिस्तार गर्नेलगायतका योजना रहेको बताए। इच्छाकामनाका ग्रामीण क्षेत्रका सडकको अवस्था दयनीय रहेकाले ती सडकको स्तरोन्नति गर्ने, भौतिक पूर्वाधारका क्षेत्रलाई प्राथमिकतामा राख्ने बताए।
‘इच्छाकामनाको ग्रामीण क्षेत्रमा सडक कालोपत्रे हुन सकेको छैन। मेरो योजना गाउँमा सडक विस्तार गर्ने, ग्राभेल भएका सडकलाई कालेपत्रे गर्ने छ,’ गुरूङले भने, ‘विकासका दृष्टिले असाध्यै पछाडि परेको इच्छाकामनामा विकासको लहर सुरू गर्ने लक्ष्य मेरो छ।’
इच्छाकामना गाउँपालिकामा गठबन्धनका तर्फबाट नेपाली कांग्रेसकी गीताकुमारी गुरूङ उम्मेदवार बनेकी छन्। उनी २०७४ सालमा गाउँपालिकाको अध्यक्ष बनेकी थिइन्। उपाध्यक्ष पदमा गठबन्धनबाट माओवादी केन्द्रका प्रताप गुरूङ र नेकपा एमालेबाट माया सिलवाल उम्मेदवार छन्।
