अस्ट्रेलियामा बसाइसराइको इतिहासमा पचास वर्ष पुगेको उपलक्ष्यमा सिड्नीमा पहिलो नेपाली जोडीलाई विशेष कार्यक्रमबीच अभिनन्दन गरिएको छ।
स्थानीय लुक्ला टिभी र भिजन फर मोटिभेसनले एक समारोहबीच पचास वर्ष पहिले पहिलो नेपाली जोडीका रूपमा बसाइसराइ गर्ने नारायण प्रधान र लीला प्रधान र केहीपछि अस्ट्रेलिया आएकी इन्द्रा वनलाई अभिनन्दन गरिएको हो।
अस्ट्रेलियाका लागि नेपाली राजदूत कैलाशराज पोखरेल, लिबरलका मल्टिकल्चर छाया मन्त्री मार्क कुरे, एनएसडब्लु विपक्षी दलका नेता मार्क स्पीकम्यान तथा सत्तारूढ लेबरका नेता मार्क बटिगेग तथा एनआरएन अस्ट्रेलियाका अध्यक्ष अनिल पोखरेलले प्रधान दम्पती र इन्द्रा वनलाई अभिनन्दन गरेका हुन्।
प्रधान दम्पती सन् १९७४ को फेब्रुअरी महिनामा स्कटल्यान्डबाट आवासीय भिसा प्राप्त गर्दै अस्ट्रेलियाको मेलवर्न आएका थिए। यस्तै, सन १९७५ मा इन्द्रा वन पनि आवासीय भिसा लिएर अस्ट्रेलियाको सिड्नी आएकी थिइन्। यसअघि विद्यार्थी र छात्रवृत्तिमा केही नेपाली अध्ययनका लागि आएता पनि पढेर फर्केको तथ्यांकले देखाउँछ। त्यति बेलासम्म अस्ट्रेलियाको आवासीय नीतिमा विदेशीहरूको लागि खुलापन नआइसकेका कारण धेरै पढेर फर्केका हुन्। आयरल्यान्डबाट पिएचडी गरेका प्रधानलाई अस्ट्रेलियामा विशेषज्ञको रूपमा जागिर दिएपछि उनी परिवार लिएर आवासीय रूपमा मेलवर्न आइपुगेका हुन्।
अस्ट्रेलियामा नेपालीहरूको बसाइसराइको पचास वर्षको इतिहास आफैंमा गौरवपूर्ण रहेको र नेपाली समाजले यसरी अभिनन्दन गर्नु आफ्नो लागि अविस्मरणीय क्षणका रूपमा रहेको प्रधानले बताए।
प्रधानले भने, ‘हिजोको दिनको सम्झना गर्दा नेपाली बोल्ने साथीभाइ खोज्न महिनौं कुर्नुपथ्र्यो तर अहिले जताततै जुन पेशामा पनि नेपाली भेटिन्छन्, यही नै खुसीको कुरा हो।’
अर्की सम्मानित व्यक्तित्व इन्द्रा वनले आखाभरी आँसु पार्दै भनिन्, ‘हामी परदेशमा रमाए पनि जन्मथलो र मातृभूमिप्रति सधैं ऋणी छौं, आज अस्ट्रेलियामा आएको पचास वर्ष पुगेछ, नेपाली समाजले सम्झियो, हामी धन्य भयौं।’
एनआरएन अस्ट्रेलियाका अध्यक्ष अनिल पोखरेलले इतिहासलाई सम्मान गर्न सकिएन भने वर्तमान पनि खल्लो हुने बताए।
‘भोलिको पुस्ताले अस्ट्रेलियाको नेपालीको इतिहास खोज्दै गर्दा हामीले सुनाउने कथा गौरवशाली बन्नुपर्छ र आजको कार्यक्रमले यसलाई स्थापित पारेको छ,’ पोखरेलले भने।
कार्यक्रममा एनआरएन ओसेनियाका संयोजक दिनेश पोखरेलले बसाइसराइको पचास वर्ष अस्ट्रेलियामा बस्ने सबै नेपालीका लागि महत्वपूर्ण चाडको रूपमा रहेको बताउँदै नारायण प्रधान र इन्द्रा वन नेपाली समुदायका अभिभावक रहेको बताए। समुदायको सम्पत्तिका रूपमा यस्ता व्यक्तित्वहरूलाई अभिनन्दन गर्न पाउनु महत्वपूर्ण क्षणका रूपमा रहेको उनले बताए।
