अस्ट्रेलियाको मेलबर्नमा तेस्रो एभरेष्ट सकर मिट २०२४ शनिबारदेखि सुरू हुने भएको छ।
सकर मिटको एक विशेष कार्यक्रमका बीच सहभागी टिमको घोषणा र ट्रफीको अनावरण गरिएको छ।
सियरा होम्स र एलायन्स इस्टेट एजेन्टको प्रायोजनमा प्रतियोगिता हुन लागेको हो। सकर मिटमा १७ वटा टिमले प्रतिस्पर्धा गर्नेछन्।
सकर मिटमा सहभागी भएका क्लबहरूले सियरा ओपन कप २०२४, एलायन्स ब्वाइज कप २०२४ र सियरा योंग गुन कप २०२४ को उपाधि उचाल्नेछन्।
खुलातर्फ हिमालयन फुटबल क्लब, क्रेगीबर्न ब्रिगेड सकर क्लब, युनाइटेड फुटबल क्लब मेलबर्न, नर्थपिक फुटबल क्लब, एभरेष्ट युनाइटेड क्लब, रोयल फुटबल क्लब, रोयल वेष्टर्न फुटबल क्लब, चन्द्रसूर्य फुटबल क्लबबीच प्रतिस्पर्धा हुने तय भएको छ।
यस्तै सिनियर समूहतर्फ एभरेष्ट युनाइटेड क्लब, अलामन्दा फुटबल क्लब, क्रेगीबर्न ब्रिगेड सकर क्लब, हिमालयन फुटबल क्लब, रोयल वेष्टर्न फुटबल क्लब र ईस्टर्न वारियर्स फुटबल क्लबले प्रतिस्पर्धा गर्नेछन्।
उता १० देखि १४ वर्ष उमेर समूहमा एभरेष्ट क्लब, क्रेगीबर्न ब्रिगेड र ईष्टर्न वारियर्सले आफ्ना खेलाडीहरूलाई मैदानमा उतार्दैछ।
शनिबार १९ अक्टोबर र २० अक्टोबर आइतबार दुई दिन यी सबै खेलहरू हुनेछन्। प्रतियोगितासँगै बालबालिकाहरूको लागि विविध गतिविधि र पुरस्कारको व्यवस्था, फुड स्टल समेत रहने आयोजकले जानकारी दिएका छन्।
१२ वर्षअघि स्थापना गरिएको एभरेष्ट युनाइटेड क्लबले आयोजना गरेको प्रतियोगिताको यो तेस्रो संस्करण हो।
-1729226651.jpg)
