ग्लोबल नेपाली
स्थायी घर स्याङ्जा भएकी रोस्मा थापा युएई (संयुक्त अरब इमिरेट्स) को सबभन्दा ठूलो सहर दुबईमा बसेको चार वर्ष भयो।
उनी त्यहाँको 'इमिरेट्स नेसनल बैंक अफ दुबई (इमिरेट्स एनबिडी)' मा काम गर्छिन्। यो अर्ध–सरकारी बैंक हो।
उनको जिम्मेवारी 'लोन प्रोसेसिङ विभाग' मा छ। यो विभागले कर्जा लिन चाहने ग्राहकको मूल्यांकन गरेर प्रतिवेदन तयार गर्छ।
'लोन प्रोसेसिङ विभागले कर्जा दिने होइन। कर्जा माग गर्ने ग्राहकको व्यावसायिक र व्यक्तिगत पृष्ठभूमि मूल्यांकन गरेर माथिल्लो तहमा प्रतिवेदन बुझाउने हो,' रोस्माले सेतोपाटीसँग भनिन्।
उनका अनुसार सोही प्रतिवेदनका आधारमा कर्जा स्वीकृति वा अस्वीकृतिको निर्णय हुन्छ। कसैको भनसुन, सिफारिस वा चिनजान आवश्यक पर्दैन। बैंकले ऋण तिर्न सक्ने क्षमता तथा व्यावसायिक र व्यक्तिगत स्वच्छता प्राथमिकताका साथ मूल्यांकन गर्छ। ऋण लिन चाहने व्यक्ति वा व्यवसायी नकारात्मक काममा संलग्न छैन भने बैंकले सजिलै ऋण दिन्छ।
उमेरले २३ वर्षीया रोस्मा बैंकको जागिरसँगै 'इन्टरनेसनल अकाउन्टस् एन्ड फाइनान्स' विषयमा स्नातकोत्तर तहको पढाइ पनि गर्दै छिन्। उनी बैंकको काममा व्यस्त रहन्छिन्। कलेज जान समय मिल्दैन, 'भर्चुअल' कक्षामा सहभागी हुन्छिन्।
पुर्ख्यौली घर स्याङ्जा भए पनि रोस्माको बाल्यकाल पोखरामा बित्यो। उनी आमाबुबाकी जेठो सन्तान हुन्। उनका एक भाइ र एक बहिनी छन्।
उनले १२ कक्षासम्म पोखरामै पढिन्। त्यससपछि उच्च शिक्षाको गन्तव्य बन्यो दुबई।
रोस्माका बुबा पनि सन् २००५ देखि दुबईमा छन्। उनी त्यहाँ 'ट्राभल एजेन्सी' चलाउँछन्। आमा गृहिणी हुन्।
पोखरामा छँदा रोस्मा बुबाका साथ धेरै पटक दुबई गएकी थिइन्। त्यसरी गइरहँदा त्यहाँको वातावरणमा अभ्यस्त भइन्। उनले स्नातक तहको पढाइ दुबईमै गर्ने निधो गरिन्।
'मैले अन्य देशमा जाने कुरा सोच्दै सोचिनँ। मलाई पढाइका लागि दुबई राम्रो छ भन्ने थाहा थियो। यहीँ आएँ,' उनले भनिन्।
दुबईमा बुबा छँदै थिए, केवल पढाइको प्रबन्ध मिल्नु थियो। उनी व्यवस्थापन संकायमा स्नातक तह पढ्ने विद्यार्थी भएर सन् २०२० मा दुबई पुगिन्।
तीन वर्षको कोर्स थियो। कलेजमा उनको कक्षा बेलुकातिर थियो। दिउँसो बुबाको ट्राभल एजेन्सीमा काम गर्थिन्, बेलुका पढ्न जान्थिन्।
दोस्रो वर्षमा पुगेपछि उनले फर्निचर बेच्ने व्यावसायिक कम्पनीको अनलाइन प्लेटफर्ममा इन्टर्नसिप गर्ने अवसर पाइन्।
'फर्निचर व्यवसायमा त्यो कम्पनी दुबईमा सबैभन्दा ठूलो थियो। त्यहाँ तीन महिना काम गरेँ,' उनले भनिन्, 'पढाइसँगै काम पनि सिक्नु थियो। त्यहाँ काम गर्दा गुणस्तरीय सेवाबारे ज्ञान भयो।'
उनी बैंकमा जागिरे हुन चाहन्थिन्। आफ्नो रूचिअनुसार सामाजिक सञ्जालमा विज्ञापन हेरेर 'इमिरेट्स एनबिडी' मा पनि आवेदन दिइरहिन्। अन्ततः चौथो पटकको आवेदन स्वीकृत भयो।
'मलाई यो बैंकमा काम गर्न एकदमै रूचि थियो। यहाँ ९० वटाभन्दा बढीका देशका मान्छे काम गर्छन्,' उनले भनिन्, 'आफूले रोजेकै बैंकमा जागिर पाउँदा धेरै खुसी भएँ। अहिले पनि शब्दमा बयान गर्न सक्दिनँ।'
स्नातक तहमा आफ्नो ब्याचमा आफूले टप गरेको (प्रथम भएको) र युनिभर्सिटीले 'एक्सिलेन्स अवार्ड' दिएको पनि उनले बताइन्।
निवासबाट उनको कार्यालय पुग्न सार्वजनिक यातायातको साधनमा एक घण्टा लाग्छ। उनी सार्वजनिक साधनमै आउजाउ गर्छिन्। दुबईमा सार्वजनिक सवारीको सेवा गुणस्तरीय छ।
बैंकमा दैनिक १० घण्टा काम गर्नुपर्छ। त्योभन्दा बढी गर्नु पर्दा अतिरिक्त पैसा पाइन्छ।
'बिहान ८ बजेदेखि साँझ ६ बजेसम्म ड्युटी हो। चाडपर्वमा बैंकले कर्जा अफर ल्याउँछ। त्यस बेला बढी काम गर्नुपर्छ। सातामा शनिबार र आइतबार बिदा हुन्छ,' रोस्माले भनिन्।
खाडी मुलुकमा पनि विकसित मुलुकको जस्तै गुणस्तरीय शिक्षा र राम्रो रोजगारीको अवसर रहेकाले यी मुलुकप्रतिको नकारात्मक सोच परिवर्तन गर्न आवश्यक रहेको उनको धारणा छ।
युएईको शिक्षा प्रणाली र रोजगारीको अवसरले नै आफूलाई लोभ्याएको उनले बताइन्। दुबईमा गुणस्तरीय शिक्षासँगै रोजगारीको पनि राम्रो अवसर छ। धेरै पैसा खर्च गरेर ठूलो देशमा जानुभन्दा दुबईमा पढ्न नेपाली विद्यार्थीहरूलाई उनी सुझाव दिन्छिन्।
'नेपालबाट नजिक छ। आउन जान धेरै खर्च लाग्दैन। यहाँ थोरै खर्चमा धेरै अवसर पाइन्छ,' रोस्माले भनिन्।
