गैरआवासीय नेपाली संघ (एनआरएनए)ले आफ्ना सल्लाहकार र पदाधिकारी सबैलाई काठमाडौं बोलाएको छ।
एनआरएनएका महासचिव गौरीराज जोशीले विज्ञप्ति जारी गर्दै अन्तर्राष्ट्रिय परिषद(आइसिसी)का सल्लाहकार,पदाधिकारी अनि राष्ट्रिय समन्वय परिषद(एनसिसी)का अध्यक्ष र पदाधिकारीहरुलाई काठमाडौं बोलाइएको जानकारी दिएका छन्।
एनआरएनएमा सिर्जना भएको जटिल परिस्थिति तथा यसको निकासको उपाय पहिचान गर्नको लागि छलफल जरूरी भएकाले अप्रिल १५ सम्म भौतिक रुपमा उपस्थित हुन आइसिसी र एनसिसीका पदाधिकारी सहित अभियान्ताहरुलाई समेत आग्रह गरिएको छ।
संघले उठान गरेका मुद्धा एवम् विषयवस्तुहरुमा प्रधानमन्त्री,गृहमन्त्री,कानूनमन्त्री तथा प्रमुख राजनीतिक दलका शीर्ष नेताहरुसँग छलफलका लागि भन्दै काठमाडौं बोलाइएको एनआरएनएले जनाएको छ।
अप्रिल १६ देखि कम्तिमा १० दिनसम्म परराष्ट्र मन्त्रालयसहित विभिन्न मन्त्रालयहरु र अन्य सरोकारवाला निकायहरुसँग विभिन्न समसामयिक विषयवस्तुमा बृहत छलफल हुने एनआरएनएको विज्ञप्तिमा उल्लेख छ।
