पठाओ नेपालले ‘पठाओ रेन्टल’ सेवा सुरू गरेको छ। ‘मुभिङ नेपाल’को आफ्नो संकल्पलाई अघि बढाउँदै कम्पनीले उक्त सेवा सुरू गरेको जनाएको छ।
कम्पनीका अनुसार अब प्रयोगकर्ताहरूले मोबाइल एपमार्फत कार, एसयूभी, माइक्रो र मिनीबसदेखि ठूला बससम्म सहजै बुक गर्न सक्नेछन्। पठाओ रेन्टल सेवामा प्रयोगकर्ताले कम्तीमा एक घण्टा अगाडि वा बढीमा सात दिनअघि नै गाडी बुक गर्न सकिने कम्पनीको भनाइ छ। विवाह, पिकनिक, पर्यटन तथा कार्यालयको प्रयोजनका लागि पनि आवश्यकताअनुसारका गाडी बुक गर्न सकिनेछ।
पठाओ नेपालका प्रबन्ध निर्देशक असिममान सिंह बस्न्यातका अनुसार सवारी बुक गर्दा प्रयोगकर्ताले आफैले भाडा प्रस्ताव समेत गर्न सक्नेछन् भने दुवै पक्षबीच सहमतिपछि यात्रा सुनिश्चित हुनेछ।
निर्धारित भाडामा सडक दस्तुर, पार्किङ, इन्धन र रातको बसाइँ लगायतका सबै खर्च समेटिनेछ। कम्पनीका अनुसार प्रयोगकताएले २४ सै घण्टा गाडी बुक गर्न सक्नेछन् ।
कम्पनीका अनुसार अन्य सेवामा जस्तै यस सेवामा पनि बीमाको सुविधा उपलब्ध गराइएको छ।
यात्रा अवधिमा कुनै गुनासा सम्बोधन गर्नका लागि २४ सै घण्टा ग्राहक सहायता सेवा सञ्चालनमा ल्याइएको छ। ग्राहकले पठाओ एपमा दिइएको फोन नम्बरमा सम्पर्क गरेर पनि गाडी बुक गर्न सक्ने कम्पनीको भनाइ छ।
'पठाओ रेन्टल सेवा यात्रुहरूको सहजता र पठाओका चालकका लागि अतिरिक्त आम्दानीको अवसरका लागि ल्याइएको हो,' कम्पनीका प्रबन्ध निर्देशक बस्न्यातले भने, 'यस सेवामार्फत् यात्रालाई अझ व्यवस्थित, पारदर्शी र प्रविधिमैत्री बनाउने लक्ष्य लिएका छौँ।'
