नेपाली काँग्रेसका सभापति शेरबहादुर देउवाले भरतपुर महानगरपलिकाको मतगणनाका क्रममा भएको अस्वाभाविक घटनामा निर्वाचन आयोगले गरेको निर्णयलाई स्वीकार गरिएको बताएका छन्।
व्यवस्थापिका–संसद्को आजको बैठकमा विशेष सम्बोधन गर्दै उनले मतगणना कि मतदान भन्ने विषय अदालतमा प्रवेश गरिसकेकाले आफ्नो थप केही धारणा नरहेको बताए। आगामी असार १४ गते स्थानीय तहको दोस्रो चरणको निर्वाचन सम्पन्न गराउन आफू र नयाँ गठन हुने सरकार प्रतिबद्ध रहने बताउँदै उनले आगामी माघभित्र तीनै चरणको निर्वाचन सम्पन्न हुने र गरिने प्रतिबद्धता व्यक्त गरे।
राष्ट्रियता,
प्रजातन्त्र र समाजवादका विषयमा आफ्नो पार्टीलाई पाठ सिकाउनु जरुरी छैन भन्दै नेता देउवाले सार्वभौमसत्ता र अखण्डतामा कोही कसैसँग सम्झौता हुनै नसक्ने धारणा राखे। संविधान कार्यान्वयनका निम्ति पहिलो सर्त भनेकै स्थानीय तहको निर्वाचन हो भन्दै उनले प्रधानमन्त्री पुष्पकमल दाहालले असहज अवस्थामा पनि राष्ट्रिय दायित्व पूरा गरेकामा धन्यवाद दिए। उनले देश र जनताका आवश्यकतालाई ख्याल गरेर मुलुक अगाडि बढेको बताउँदै अब राष्ट्रिय दायित्व पूरा हुने र गरिने विश्वास प्रकट गरे। रासस
-1746009348.jpg)
