शेरबहादुर देउवा सर्नुअघि प्रधानमन्त्रीको सरकारी निवासको व्यापक मर्मत सम्भार हुने भएको छ।
आइतबारदेखि सहरी विकास तथा भवन निर्माण विभागले प्रधानमन्त्री निवास बालुवाटारको मर्मत सम्भार सुरु गरेको हो।
देउवा प्रधानमन्त्री निर्वाचित भएपछि पूर्वप्रधानमन्त्री पुष्पकमल दाहालले बालुवाटार छोडेको र देउवाले केही समयपछि मात्र बालुवाटार सर्ने बताएपछि विभागले प्रधानमन्त्री निवासको सरसफाइ र मर्मत गर्न लागेको हो।
विभागमा महानिर्देशक शिवहरि शर्माले १० वर्षपछि प्रधानमन्त्री निवासमा व्यापक मर्मत सम्भार हुन लागेको बताए। ‘यसअघि प्रधानमन्त्रीले बालुवाटार छोडेको दुई/तीन दिनमै नयाँ प्रधानमन्त्री सरेर आइहाल्ने भएकाले ठूलो सरसफाई र मर्मत सम्भार गर्न समय नै पाउँदैन्थ्यौं,’ शर्माले सेतोपाटीसँग भने, ‘त्यसरी सरसफाई गर्न नपाएको १० वर्ष भइसकेको थियो। यो पालि समय भएकाले राम्ररी सफा गरेर रंगरोगन गर्न लागेका छौं।’
उनले प्रधानमन्त्री निवासका कार्पेट र पर्दा फेर्न र भित्तामा रंगरोगन गर्न लागिएको जानकारी दिए।
‘किचन पनि धेरै फोहोर भइसक्यो, मन्त्रिपरिषद् बैठक बस्ने कोठाको एसी पनि कालो भएको छ’, शर्माले भने, ‘यी लगायत अरु भित्री साजसज्जाका कुरा पनि यसपालि परिवर्तन गर्न लागेका छौं।’
आइतबार सुरु भएको मर्मत सम्भार र रंगरोगनको काम सकिन एक हप्ता लाग्ने शर्माले जानकारी दिए।
जेठ २३ गते देउवा प्रधानमन्त्री निर्वाचित भएका थिए। त्यसको भोलिपल्ट पूर्वप्रधानमन्त्री दाहालले बालुवाटार छोडेका थिए।
प्रधानमन्त्री देउवा सोमबार बालुवाटार सर्ने गरी तयारी भइरहेको छ।
-1746009348.jpg)
