नेकपा एमालेले मधेसका केही मुख्य सहरमा मेयरको उम्मेद्वार बनाउन अन्य पार्टीका कार्यकर्ता तानेको छ। वीरगञ्जमा बसरुद्दीन अन्सारी, लहानमा मुन्नीलाल साह र राजविराजमा सुखीराम यादव मेयरको टिकट पाउने भएपछि एमाले प्रवेश गरेका छन्।
वीरगञ्जमा मेयरको टिकट पाउने भएपछि बसरूद्धिन अन्सारी सोमबारै माओवादी छाडेर एमाले प्रवेश गरेका हुन्। अन्सारी वीरगञ्जको नेसनल मेडिकल कलेजका प्रबन्ध निर्देशक हुन्।
एमाले प्रचार विभाग सचिव विष्णु रिजालले बसरूद्धिन वीरगञ्ज महानगरपालिकामा एमाले तर्फबाट मेयरको सम्भावित उम्मेद्वार रहेको पुष्टि गरे।
उनले भने, 'उहाँ मेयरको सम्भावित उम्मेद्वार हुनुहुन्छ। यसबारे पार्टी स्थायी समितिले चाँडै निर्णय गर्छ।'
सिरहाको लहानमा मुन्नीलाल पनि मेयरको टिकट पाउने भएपछि एमाले फर्किएका छन्। उनी केही वर्षअघि एमाले छाडेर माओवादीमा गएका थिए। लहानको मेयरमा उनको नामबारे पनि छलफल भइरहेको प्रचार विभाग सचिव रिजालले बताए।
मधेशको अर्को मुख्य सहर राजविराजमा एमालेबाट मेयरको टिकट पाउने भएपछि सुखीराम यादव एमाले प्रवेश गरेका छन्। उनी उपेन्द्र यादवको संघीय समाजवादी फोरम छाडेर एमाले प्रवेश गरेका हुन्। एमाले नेता रघुवीर महासेठले लहानको मेयरका लागि यादवको नामबारे छलफल भइरहेको बताए। 'अरू पनि केही नाम छन् र उहाँको बारेमा पनि छलफल भइरहेको छ,' नेता महासेठले भने।
वीरगञ्ज, राजविराज र लाहान तीनै सहर मधेस आन्दोलनका मुख्य विन्दु हुन्। संविधान जारी गर्ने ताका भएको पछिल्लो आन्दोलन राजविराजमा बढी चर्किएको थियो। यसले अरुतिर पनि आन्दोलन विस्तार भयो। आन्दोलनकारी सीमा नाकामा केन्द्रित भएपछि वीरगञ्ज आन्दोलनको केन्द्र बन्न पुग्यो।
त्यही बेला एमाले अध्यक्ष केपी शर्मा ओली प्रधानमन्त्री भएपछि मधेसवादी दलले एमालेलाई मधेसविरोधी पार्टीका रूपमा चित्रित गरेका थिए। मधेसका केही स्थानमा एमाले पार्टी कार्यालय तोडफोड गरिएको थियो। केही समयअघि एमालेले मधेसमा गतिविधि बढाउने प्रयास थालेपछि मधेसवादी दलका कार्यकर्ताले पर्सा जिल्लामा 'एमाले प्रवेशमा रोक लगाउने' निर्णयसमेत गरे। मधेसमा आफ्ना कार्यकर्ताले असुरक्षित महशुस गरेको एमालेले बताउँदै आएको थियो।
गत फागुनमा एमालेले तराईका २० जिल्लामा 'मेची-महाकाली अभियान' सञ्चालन गर्ने भनेको थियो। राजविराजको कार्यक्रममा मधेसो मोर्चाका कार्यकर्ताले अवरोध गरेका थिए। यहाँ झडप हुँदा प्रहरीको गोली लागी तीन जनाको मृत्यु समेत भएको थियो। यो घटनापछि एमालेले अभियानअन्तर्गत दुई नम्बर प्रदेशका लागि निर्धारण गरेका कार्यक्रम नगर्ने निर्णय गरेको थियो।
यी सबै घटनाक्रमबाट प्रभावित बनेको एमालेले स्थानीय चुनावमा आफ्नो प्रभाव बढाउन अन्य पार्टीका कार्यकर्ता प्रवेश गराई उम्मेद्वार बनाउने रणनीति लिएको हो।
२०६४ को मधेस आन्दोलनपछि एमालेका धेरै कार्यकर्ता मधेसवादी दलमा प्रवेश गरेका थिए। यता मधेसबाट प्रतिनिधित्व गर्ने एमालेका सबैभन्दा वरिष्ठ नेता रामचन्द्र झा एमाले छाडेर माओवादीमा प्रवेश गरेका थिए। उनीसँगै ठूलो संख्यामा नेता कार्यकर्ताले एमाले छाडेका थिए। यसले एमालेलाई मधेसमा कार्यकर्ताको खडेरी सिर्जना भएको थियो।
पछिल्लो मधेस आन्दोलनका कारण करिब दुई वर्ष पार्टी गतिविधि सञ्चालन गर्न नपाउँदा एमालेलाई चुनावमा जान कठिन भइरहेको थियो। अन्य पार्टीमा रहेका र स्थानीय मतदातामाझ पकड रहेका व्यक्तिलाई पार्टी प्रवेश गराउँदै टिकट दिने नीति लिएर मधेसमा एमालेले स्थानीय चुनावका लागि थप शक्ति आर्जन गर्न खोजेको छ।
-1746009348.jpg)
