सरकारले स्थानीय तह दोस्रो चरणको निर्वाचनमा ढुक्क भएर मतदान गर्न आम मतदातालाई आह्वान गरेको छ ।
गृहमन्त्री जनार्दन शर्माले सबै मतदान केन्द्रमा सुरक्षाको व्यवस्था सुदृढ रहेको उल्लेख गर्दै ढुक्क भएर मतदानमा भाग लिन सबै मतदातासँग आग्रह गरेका हुन् । सोमबार रिपोर्टर्स क्लबमा आयोजित साक्षात्कार कार्यक्रममा बोल्दै उनले पहिलो चरणको निर्वाचनको अनुभवलाई समेत ध्यानमा राखेर स्थानीय तह दोस्रो चरणको निर्वाचनको सुरक्षा व्यवस्था थप विकसित र परिमार्जित गरिएको पनि स्पष्ट पारे।
उनले भने,‘निर्वाचनको लागि सुरक्षाको कुनै समस्या छैन, सरकारले सबै प्रबन्ध मिलाएको छ, सबै सुरक्षा निकायहरुलाई परिचालन गरेको छ, त्यसो भएको हुँदा सबै मतदाताहरु म्तदान केन्द्रमा गएर आफ्नो मतदान अधिकार प्रयोग गर्नुहोस्, तपाईहरुलाई चाहिने सबै सुरक्षा व्यवस्था हामीले गरिसकेका छौं ।’
बुधबार १, ५ र ७ नम्बर प्रदेश अन्तर्गतका ३ सय ३४ वटा स्थानीय तहमा दोस्रो चरणको निर्वाचन हुँदैछ । गृहमन्त्री शर्माले निर्वाचनका लागि आवश्यक सबै सुरक्षा व्यवस्था गरिएको पनि स्मरण गराए। उनले मतदान केन्द्र, मतदान स्थल, मतपेटिकाको सुरक्षा र मतगणना समेतलाई ध्यानमा राखेर सुरक्षा व्यवस्था मिलाइएको पनि बताए। सरकारले अति संवेदनशील, संवेदनशील र सामान्य गरी तीन वटा सुरक्षा घेरा बनाएर सुरक्षाकर्मी परिचालन गर्ने नीति नै बनाएको छ ।
उनले भने,‘निर्वाचन शान्तिपूर्ण रुपमा सफल बनाउन र आम मतदाताहरुलाई ढुक्क भएर मत हाल्नको लागि म यही मञ्चबाट अपिल गर्छु, निर्वाचन सम्पन्न गराउनको लागि कर्मचारीदेखि लिएर आवश्यक सुरक्षाकर्मीहरुलाई सबै क्षेत्रमा खटाईसकिएको छ, अब मतदान केन्द्रमा कुनै समस्या छैन।’
मतदाताहरुलाई मत हाल्न जाँदा कुनै बाधा, अबरोध नआउनेबारे आश्वस्त पार्दै भने,‘तपाईहरु आफ्नो मताधिकार स्वतन्त्र, भयरहित र निर्भिक रुपमा गर्न पाउनुहुनेछ, त्यसको लागि तपाईहरुलाई जस्तोसुकै सुरक्षा दिनपनि सरकार तयार छ।’
गृहमन्त्री शर्माले स्थानीय तहको निर्वाचनलाई सहज रुपमा सम्पन्न गर्न सरकारले तीन चरणमा निर्वाचन गर्नु परेको पनि प्रष्टिकरण दिए। उनले मधेश केन्द्रित सबै दललाई निर्वाचन ल्याउन पनि सरकारले तेस्रो चरणको निर्वाचन असोज २ गते गर्ने निर्णय लिनु परेको पनि स्पष्ट पारे। गृहमन्त्री शर्माले दोस्रो चरणको निर्वाचनमा स्वतन्त्र उम्मेदवारको हैसियतमा राष्ट्रिय जनता पार्टी, नेपालले समेत निर्वाचनमा भाग लिने वातावरण बनाउनु सरकारको ठूलो सफलता भएको पनि उल्लेख गरे। उनले विप्लव नेतृत्वको नेपाल कम्युनिष्ट पार्टीले समेत निर्वाचनमा भाग लिएकोमा खुसी समेत व्यक्त गरे।
उनले राजपासँगको सहमतिमा नै प्रदेश नम्बर २ को निर्वाचन तेस्रो चरणमा तोकिएको बताउँदै भने,‘हाम्रो सम्मानीय प्रधानमन्त्री र राजपावीचको सहमतिमा नै प्रदेश नम्बर २ को निर्वाचन तेस्रो चरणमा राखिएको हो, अहिलेको दोस्रो चरणको निर्वाचनमा उहाँहरुले स्वतन्त्र रुपमा उम्मेद्धवारी दिनुभएको छ, विप्लव माओवादीका साथीहरुपनि सहभागी हुनुभएको छ, म उहाँहरुलाई चुनावमा भाग लिएकोमा यही मञ्चबाट धन्यवाद दिन चाहन्छु।’
गृह मन्त्रालयले स्थानीय तह दोस्रो चरणको निर्वाचनका लागि आवश्यक्ता अनुसार सुरक्षाकर्मी परिचालन गर्ने व्यवस्था गरेको पनि जनाएको छ। गृहमन्त्री शर्माले मौन अवधिमा निर्वाचन आचारसंहिता विपरितका गतिविधि नगर्न पनि सबैमा आग्रह गरे। बुधबार तीन वटा प्रदेश अन्तरगतका ३५ जिल्लाका ८ हजार ३ सय ६४ मतदान केन्द्रमा निर्वाचन हुँदैछ । यता, निर्वाचन आयोगले पनि सरकारले निर्वाचनका लागि आवश्यक सुरक्षा व्यवस्था मिलाएको जनाएको छ ।
शर्माले भने,‘विप्लवजीको पार्टीपनि निर्वाचनमा सहभागी भएको छ, उहाँहरु भेष्ट लगाएर चुनावी प्रचारप्रसारमा हुनुहुन्छ, यो त खुशीको कुरा हो नि।’ त्यस्तै उनले राजपाका नेता तथा कार्यकर्ताहरुपनि स्वतन्त्र रुपमा निर्वाचनमा सहभागि भएको जनाए । उनले थपे,‘राजपापनि चुनावमा सहभागी भैसकेको छ, त्यसैले अब चुनाव कसैले विथोल्न सक्दैन्।’
हेर्नुहोस् भिडियोमा
https://www.youtube.com/watch?v=_CbnVlWueE8
-1746009348.jpg)
