भारतीय क्रिकेट टिमका खेलाडी वेष्ट इन्डिज भ्रमणमा राम्रो प्रदर्शन त गरिरहेका छन नै, परिवारसँग रमाइलो गर्न पनि पछाडि हटेका छैनन्।
यस्तै, एउटा तस्बिर सोशल मिडियामा भाइरल भइरहेको छ। जसलाई भारतीय खेलाडीका फ्यानहरुले खुब रुचाएका छन्।
भारत र वेष्ट इन्डिजबीचको एकदिवसीय शृंखलाअन्तर्गत अघिल्लो दुई खेलमा भ्रमणकारी टोली १–० ले अगाडि छ। भारतीय टोली लन्डनमा दुई साताअघि सम्पन्न च्याम्पियन्स ट्रफीको फाइनल खेलेपछि उतैबाट क्यारेबियन भ्रमणमा निस्किएको हो।
अब तेस्रो र चौथो खेल नर्थ साउन्डमा हुने कार्यक्रम छ। यसका लागि त्रिनिडाड पुगेको भारतीय टोलीलाई आइपिएलका दुई चर्चित खेलाडी ड्वेन र डारेन ब्राभोले स्वागत गरेका थिए। यी दुवै खेलाडी भारतीय टोलीले अभ्यास गरेको पोर्ट अफ स्पेनमा पुगेर घरमा खानाको लागि निम्तो गरेका थिए।
ब्राभो परिवारको निम्तोलाई स्विकार गरेको भारतीय टोलीले सोमबार राती तस्बिर पनि खिचाएको थियो। जसलाई प्रायः सबै खेलाडीले इन्स्टाग्राममा सेयर गरेका थिए।
ब्राभोले लेखेका छन्, ‘हिजो राती मेरो अर्की आमाको छोरा तथा मेरो भाई धोनी आफ्नो सुन्दर छोरीसँग घर आएका थिए। जहाँ मेरो आमा पनि हुनुहुन्थ्यो।’
आइपिएलको टिम चेन्नई सुपरकिङ्सबाट धोनी र ब्राभो सँगै खेल्ने गर्छन्। महेन्द्रसिंह धोनीसँग कप्तान विराट कोहली र शिखर धवन पनि थिए। शिखरले आफ्नो ट्विटरमा लेखेका छन्, ‘हामीले डिजे ब्राभोको घरमा निकै रमाइलो गर्यौं।’
भारतीय खेलाडीहरु आफ्नो परिवारका साथ ब्राभो परिवारको घर पुगेका थिए। जसमा धोनीकी श्रीमति साक्षीले बच्चासँग खिचेको तस्बिर सार्वजनिक गरेकी छिन्।
