पूर्व टेस्ट खेलाडी तथा चर्चित कमेन्टेटर रवी शास्त्रीले भारतीय क्रिकेट टिमको मुख्य प्रशिक्षकका लागि आवेदन दिएका छन्।
सन् २०१४ देखि २०१६ सम्म दुई वर्षका लागि भारतीय टिमको निर्देशक बनिसकेका शास्त्री कप्तान विराट कोहलीले यस पदका लागि सबैभन्दा रुचाएको व्यक्ति मानिन्छन्। शास्त्रीले गत वर्ष पनि यो पदका लागि आवेदन दिएका थिए। तर, उनको स्थानमा अनिल कुम्बलेलाई महत्व दिइएको थियो।
विराट कोहलीसँग विवाद बढेपछि गत साता कुम्बलेले भारतीय टिमको मुख्य प्रशिक्षकबाट राजीनामा गरेका थिए। यसपछि भारतीय क्रिकेट बोर्ड (बिसिसिआई) ले उनको सम्झौता नवीकरण नगर्ने र नयाँ प्रशिक्षकको खोजी गर्ने अभियानलाई तिब्रता दिएको थियो।
भारतीय टिमको मुख्य प्रशिक्षकका लागि बीरेन्द्र सेहवाग, टम मुडी, रिचार्ड बायबस र लालचन्द राजपुतले पनि आवेदन दिएका थिए।
