नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पार्टीको भ्रातृ संगठन अखिल क्रान्तिकारीका दुवै समूहसँग छलफल गरेका छन्।
मंगलबार खुमलटारमा पदाधिकारी गठन एकलौटी गरेको भन्दै असन्तुष्ट बनेका पवन कार्की समूह र अध्यक्ष पञ्चा सिंह समूहसँग उनले छलफल गरेका हुन्।
कार्कीले अहिले समानान्तर गतिविधि गर्दै आएका छन्।
अखिलमा देखिएको विवादबारे छलफल गर्न दुवै पक्षलाई उनले बोलाएका हुन्।
सम्मेलनदेखि नै केही कमजोरी भएको र पछि पदाधिकारी चयनमा पनि केही कमजोरी भएको स्वीकार गर्दै कसरी सुधार गरी अघि बढ्न सकिन्छ भनेर प्रचण्डले छलफल गरेको कार्कीले बताए।
‘यीबारे स्थायी कमिटी बैठकमा छलफल गरिने छ’, प्रचण्डको भनाइ उद्धृत गर्दै उनले भने, ‘तपाईंहरूले केही गर्नु भएको छैन। तर संगठनमा विवाद लामोसम्म राख्नु हुँदैन। त्यसैले यसबारेमा स्थायी कमिटीले केही न केही निर्णय गर्नुपर्छ।’
आयोजक कमिटी बनाउन सकिने भए पनि चुनावअघि बन्न सम्भव नभएको प्रचण्डले बताए।
यसअघि संगठनभित्र देखिएको समस्या अध्ययन गरी सुझाव दिन समिति गठन गरिएको थियो। उक्त कार्यदलले विवाद समाधानका लागि सुझाव दिएको कार्कीले बताए। रमेश मल्ल नेतृत्वको तीन सदस्यीय समिति बनेको थियो।
उक्त कार्यदलले संस्थापन पक्षले कारबाही फिर्ता लिने र समानान्तर समिति खारेज गर्ने, दुवैलाई मिलाएर वा छुट्टै तदर्थ समिति बनाएर राष्ट्रिय सम्मेलन आयोजन गर्ने, निश्चित उम्मेर हद लागू गर्ने र संस्थापन पक्षले गरेको कारबाहीलाई नै सदर गर्ने। तर, त्यसो गर्दा संगठनको समस्या हल नहुने भन्दै चार सुझाव दिएको कार्कीले बताए।
अखिल क्रान्तिकारी अध्यक्ष पञ्चा सिंहले समानान्तर गतिविधि बन्द गरेर जिम्मेवारीमा फर्किन पवन कार्कीलाई पार्टी अध्यक्षले निर्देशन दिएको बताइन्।
'अध्यक्षले पवनजीलाई समानान्तर गतिविधि बन्द गर्नुहोस् र जिम्मेवारीमा फर्किनुहोस् भन्नुभएको छ।जिम्मेवारीमा फर्किएपछि कारबाही फुकुवा हुन्छ,' पञ्चाले भनिन्, 'अध्यक्षले भनेपछि पवनजी साथीहरूसँग सल्लाह गर्छु भनेर हिँड्नुभयो।'
