नेकपा माओवादी केन्द्रका सांसद लेखनाथ दाहालले रोष्ट्रमबाटै सभामुखको आलोचना गरेपछि एमाले सांसद सूर्य थापाले नियमापत्ति जनाएका छन्।
बुधबार बजेटमाथिको छलफलमा बोल्दै सांसद दाहालले अवरूद्ध संसद खुलाउन प्रतिपक्षीको माग अनुसार प्रधानमन्त्री जवाफ दिन रोष्ट्रममा उभिँदा सभामुखले नै नियमावलीविपरित प्रधानमन्त्रीलाई रोकेर प्रतिपक्षी सांसदहरूलाई बोल्न दिएको बताएका थिए।
उनले सदनमा सभामुखदेखि सांसदसम्म सबैजना संविधान र नियमावलीबाट बाँधिने हुँदा सभामुखले पनि नियमावलीविपरित गर्न नहुने बताए।
'सभामुख आफैले पनि प्रतिनिधि सभा नियमावलीको उल्लंघन गर्नुभयो,' उनले भने, 'रोष्ट्रममा प्रधानमन्त्रीलाई रूलिङ गर्ने कि सांसदहरूलाई रूलिङ गर्ने? तपाईँ चुप लाग्नुस्, उहाँहरू बोल्नुहुन्छ भन्ने?,' उनले भने।
उनले संसदमा प्रधानमन्त्रीले बोलिसकेपछि प्रमुख प्रतिपक्षी दलका नेतालाई बोल्न दिएकोबारेमा पनि सभामुखको आलोचना गरे।
उनले सभामुखलाई नियमावलीमा रहेर सदन चलाउन अनुरोध गरेपछि सूर्य थापाले नियमापत्ति जनाउँदै सभामुखको आलोचना गर्न नपाइने बताए।
'२१ (ख)मा सभामुखको आचरणको आलोचना गर्न नहुने भनेर स्पष्ट लेखिएको छ। सभामुखको आलोचना गर्न कि बजेट वक्तव्यमाथि छलफलमा भाग लिन रोष्ट्रममा जानुभएको हो कि,' उनले भने,' कहिले पित्तल लिएर जानुहुन्छ, कहिले चाँदी लिएर जानुहुन्छ, कहिले प्रधानमन्त्रीको वकिल भएर जानुहुन्छ।'
उनले सदनमा प्रमुख प्रतिपक्षीको नेताले कति लामो बाेल्ने भन्ने उनकै तजबिजको कुरा रहेकाे समेत बताए।
त्यसपछि सभामुख घिमिरेले प्रतिनिधि सभाको नियमावली २०७९ को नियम २१ को खण्ड 'ख' को व्यवस्थाप्रति ध्यानाकर्षण गराएका थिए।
