राष्ट्रिय स्वतन्त्र पार्टीका सांसद मनिष झाले ०४७ सालपछिका सबै फाइल खोल्न आग्रह गरेका छन्।
प्रतिनिधि सभाको बुधबारको बैठकमा बोल्दै सांसद झाले ०४७ पछिका सबै नेताहरूको फाइल खोल्ने प्रस्ताव पहिलोपटक सरकारमा सहभागी हुँदा रास्वपाको माग अनुसार न्युनतम साझा कार्यक्रममा उल्लेख भएको र रास्वपा त्यसमा अझै अडिग रहेको पनि बताए।
‘सबैको फाइल खोलौं, मेरै सभापतिको पनि खोलौं,’ उनले भने।
यसलाई टर्निङ प्वइन्टको हुनसक्ने पनि उनको भनाइ थियो।
‘मेरो सभापतिको पनि खोल्नुस् । तर यसलाई टर्निङ पोइन्टको रूपमा लिऔं व्यक्तिगत कुण्ठा र प्रहारका रूपमा नलिऔं। आउनुस् सँगै काम गरौं,’ उनले भने।
झाले रास्वपाको जन्म नै सुशासनको नारा लिएर भएकाले सुशासन स्थापना गर्न आफ्नो पार्टी र नेताहरू कहिल्यै बाधक नबन्ने बताए।
‘हामीबाट सुशासन नपाइएला कि वा सुशासनका लागि हामीले अवरोध गर्ला कि भनेर आशंका कतै नगर्नुस्। किनकी हाम्रो दलको सिर्जना र स्थापनाको आधार नै त्यही हो,’ उनले भने।
तर प्रतिपक्षी दलले व्यक्तिमाथि प्रहार गरी कुण्ठाको राजनीतिक गरिरहेको सांसद झाले बताए।
उनले संसदको नियमावलीमा पनि एकै व्यक्तिमाथि पटक-पटक निराधार आरोप लगाउन नमिल्ने उल्लेख रहेको बताए।
त्यसमा सुरक्षा निकायले आफ्नो राय दिइसकेको र प्रधानमन्त्रीले पनि संसदलाई जानकारी दिइसकेको बताए।
उनले सभापति लामिछानेविरूद्ध प्रायोजित केही पत्रकारहरूलाई लेख्न लगाइएको सूचनामात्र रहेको बताए।
‘त्यसमा प्रश्न छ निष्कर्ष छैन। कानुनी र प्रक्रियागत रूपमा जाऔं। कति कुण्ठा पालेर बस्नुहुन्छ। यस्तो राजनीति नगरौं,’ उनले भने।