सिरियामा विद्रोही लडाकू राजधानी दमास्कस प्रवेश गरेपछि राष्ट्रपति बसर अल असदले देश छाडेका छन्।
शनिबारदेखि सिरियाका मुख्य-मुख्य सहर कब्जा गर्दै अघि बढेको विद्रोही समूह आइतबार दमास्कस पुगेको थियो।
दमास्कस पुगेपछि राष्ट्रपति बसर अल असदले देश छाडेका थिए।
विद्रोही लडाकू समूहले सिरियाको सरकारी टेलिभिजनबाट आइतबार दिउँसो सम्बोधन गर्दै सिरियामा २४ वर्षे तानाशाही शासनको अन्त्य भएको घोषणा गरेको हो।
उनीहरूले सिरिया अब स्वतन्त्र भएको र यहाँबाट विस्थापितहरू फर्कन सक्ने र असदले जेल हालेकाहरू पनि मुक्त हुन सक्ने भनेका छन्।
उनीहरुले राष्ट्रपति असदले देश छाडेको भने पनि कहाँ गएको भन्ने खुलेको छैन।
आइतबार बिहान ४ सहर दारा, कुनेत्रा, सुवेदा र होम्स २४ घन्टामै कब्जा गरेर दमास्कस छिरेलगत्तै राष्ट्रपति असद भागेको भनिएको थियो। यद्यपि उनको सचिवालयले भने विज्ञप्ति निकालेर नै राष्ट्रपति असद दमास्कसमै रहेको भनेको थियो।
यद्यपि त्यहाँको सेनाले आफ्ना कर्मचारीलाई राष्ट्रपति असद देशमा नरहेको भन्ने ब्रिफिङ गरेको थियो। लगत्तै विद्रोही समूहले त्यहाँको सरकारी टेलिभिजनबाट सिरियाली नागरिकहरूलाई सम्बोधन गर्दै असदको शासन अन्त्य भएको घोषणा गरेको हो।
सिरियाका राष्ट्रपति कहाँ गए भन्ने बारेमा यकिनका साथ कतै पनि उल्लेख छैन।
केही सञ्चारमाध्यमले राष्ट्रपति असद संयुक्त अरब इमिरेट्स (युएई) छन् भनेर लेखेको छ तर त्यो पुष्टि नभएको उल्लेख गरेका छन्।
रोयटर्स लगायत केही समाचार संस्थाहरूले उनी चढेको जहाज दुर्घटनामा परेको हुनसक्ने भनेर पनि लेखेका छन्।
विद्रोहीहरू दमास्कस प्रवेश गरेपछि सिरियन जहाजा दमास्कस विमानस्थलबाट उडेको थियो। फ्लाइटराडारले पनि दमास्कसबाट उडेको जहाजलाई नोटिस गरेको थियो।
तर उडेको केही बेरमै जहाज फ्लाइटराडारको नियमनबाहिर पुगेको थियो। जहाज सुरूमा सिरियाको तटीय क्षेत्रतर्फ उडेको थियो। अवावाइट नजिक पुगेपछि जहाजले अचानक युटर्न लिएको र फ्लाइटराडारको ट्र्याकिङबाहिर पुगेको थियो।
रोयटर्सले तुरुन्तै बोर्डमा को थियो भनेर निर्धारण गर्न नसकिएको रोयटर्सले जनाएको छ। यद्यपि सिरियाका दुई स्रोतहरूलाई उद्धृत गर्दै विमान दुर्घटनामा असदको मृत्यु भएको हुन सक्ने धेरै उच्च सम्भावना रहेको भनेको छ।
त्यसबाहेक राष्ट्रपति असदको स्थितिबारे कुनै पनि सञ्चारमाध्यमहरूले लेखेका छैनन्। उनीको अवस्था अहिलेसम्म अज्ञात नै भएको भनिएको छ।
अमेरिकामा राष्ट्रपति निर्वाचित भएका डोनाल्ड ट्रम्पले सिरियाका राष्ट्रपतिको रक्षा गर्न नसकेको आरोप लगाएका छन्।
सामाजिक सञ्जाल प्लेटफर्म एक्समा लेख्दै उनले सिरियाली राष्ट्रपति देश छाडेर भागेको र रूस र भ्लादिमिर पुटिनले युक्रेनमा ध्यान केन्द्रित गर्दा असदको रक्षा गर्न नसकेको भनेका भनेका छन्।
त्यसकारण मध्यपूर्वमा लडाई चलिरहेको सबै ठाउँमा तत्काल युद्धविराम हुनुपर्ने उनले बताए।
