ताप्लेजुङको पाथीभरा क्षेत्रमा केबलकार निर्माणको विषयमा झडप हुँदा घाइते भएकाहरूको उपचार खर्च सरकारले बेहोर्ने भएको छ।
मंगलबार गृहमन्त्री रमेश लेखकले सांसदहरूसँग छलफल गरेपछि उक्त निर्णय गरेको बैठकमा सहभागी एक सांसदले जानकारी दिए।
उनका अनुसार अहिले झडपमा घाइते भएका सबैको उपचार खर्च बेहोर्ने निर्णय भएको छ।
यस्तै, उक्त विषय बुझेर समाधानका लागि वार्ता गर्न समिति गठन गर्ने निर्णय भएको उनको भनाइ छ। त्यसका लागि बुधबार गृहमन्त्री संस्कृति, पर्यटन तथा उड्डययनमन्त्री बद्रीप्रसाद पाण्डेसँग बसेर कसको नेतृत्वमा समिति गठन गर्ने भनेर निर्णय गर्ने उनले बताए।
पर्यटनमन्त्रीसँग छलफल गरेपछि पुन: सांसदहरूसँग बैठक बसेर समिति गठन गरिने छ। गृहमन्त्रीले यस विषयमा सरकार गम्भीर रहेको सांसदहरूलाई बताएका थिए।
पाथीभरा मुकुम्लुङ केबलकार दर्शन प्रालिले त्यहाँ कात्तिक २३ गतेदेखि निर्माणको काम सुरू गरेको थियो। निर्माण कम्पनी पक्षधर र अर्को पक्षबीच विरोध हुँदै आएको छ।
शनिबार भने प्रहरी र सशस्त्र प्रहरी बलको गस्तीको क्रममा शंकास्पद गतिविधि भएको सूचनाको आधारमा सुरक्षाकर्मीले एक गोठमा अनुगमन गरेको थियो। त्यहाँबाठ हतियारहरू बामफोक, खुकुरी, गुलेली र लाठी बरामद गरेको थियो।
त्यसपछि दुई पक्षबीच झडप हुँदा प्रहरी निरीक्षकसहित २१ जना घाइते भएका थिए। 'नो केबलकार' समूहका चार जना घाइते भएका थिए। जसमध्ये दुई जनालाई तिघ्रामा गोलीसमेत लागेको थियो।
मन्त्री लेखकले ताप्लेजुङ, इलाम, पाँचथर र तेह्रथुमका प्रतिनिधि सभा सांसदहरूलाई छलफलका लागि बोलाएका थिए। गत शनिबार पाथीभरा केबलकार निर्माण गर्ने क्रममा ‘नो केबलकार’ समूह र सुरक्षाकर्मीबीच झडप भएको थियो।
