नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड'ले देशको भविष्य पछाडि फर्केर नभई अगाडि बढेर मात्रै उज्वल हुने बताएका छन्।
नयाँ वर्ष २०८२ को अवसरमा शुभकामना सन्देश जारी गर्दै प्रचण्डले उज्वल भविष्यका लागि दृढतापूर्वक आफ्ना पाइलाहरू अगाडि बढाउन आह्वान गरेका छन्।
'आत्मनिर्भर अर्थतन्त्रको विकासमार्फत रोजगारी सृष्टी गरौं। सुशासनका नयाँ मानकहरू स्थापित गरौं। देशलाई उन्नत र समृद्ध राष्ट्र निर्माण गर्न एकताबद्ध भएर अगाडि बढौं। नयाँ वर्षको अवसरमा यही दृढ संकल्प गर्न आह्वान गर्छु,' उनले भने।
अध्यक्ष प्रचण्डले नयाँ साल नयाँ चुनौती र अवसरहरू लिएर उपस्थित भएको बताएका छन्। उनले जनताको अधिकारलाई ऐतिहासिक रूपमा सुनिश्चित गरेको संविधानको पूर्ण कार्यान्वयन नहुँदा लोकतान्त्रिक प्रणालीप्रति नै कतिपयले प्रश्न उठाउन खोजेको बताए।
'सरकारले दलाल र विचौलियाको पक्षमा स्वेच्छाचारी निर्णयहरू लिइरहँदा जनआक्रोश बढ्दै गएको छ। जसको फाइदा प्रतिगामी शक्तिहरूले लिन खोजिरहेका छन्,' उनले भने।
त्यसकारण त्यसैले सरकारका जनविरोधी क्रियाकलाप र प्रतिगामी षड्यन्त्रविरूद्ध संयुक्त प्रतिरोध गर्न आवश्यक रहेको उनले बताए।
'नेपाली जनता लोकतान्त्रिक गणतन्त्रको विलकल्प अझै सुदृढ लोकतान्त्रिक गणतन्त्र हो भन्ने कुरामा र सामाजिक न्याय र अग्रगामी परिवर्तन चाहन्छन् भन्ने तथ्य पुनः पुष्टी गर्दै नयाँ संकल्प लिन अग्रसर छन्। यही संकल्प र प्रतिबद्धता नै नयाँ वर्ष २०८२ को शुभकामना हो,' सन्देशमा प्रचण्डले भनेका छन्।
