नेकपा (एमाले) मोरङमा इतर पक्षलाई किनारामा पार्ने पार्टी संस्थापन पक्षको निर्णय निर्वाचनमार्फत् लगातार उल्टिँदै गएको छ।
एक वर्षअघि विराटनगरको मानगढ खानेपानी निर्वाचनबाट सुरू भएको एमाले मोरङभित्रको अन्तरकलहले मानगढको खानेपानीको निर्वाचन नतिजासँगै एउटा निष्कर्ष पाएको छ।
गत वर्ष जेठ १९ मा मानगढ खानेपानीको निर्वाचन भएको थियो। त्यसमा एमालेबाट दुई जना उम्मेदवार थिए। हालसम्म अध्यक्षको जिम्मेवारी निर्वाह गरिरहेका रामबहादुर घिमिरेलाई जिल्लाको संस्थापन पक्षले अघि सारेको थियो।
अहिले प्रतिनिधिसभा सार्वजनिक लेखा समिति सभापति ऋषिकेश पोखरेलले त्यसबेला भर्खरै जिल्ला अध्यक्षबाट बिदा लिएका थिए। उपाध्यक्ष बाबुराम कार्कीले संगठन कमिटी अध्यक्षको जिम्मा पाएका थिए।
ती दुवै नेताको रोजाइमा परेका घिमिरेलाई खानेपानी चुनावमा विनोद ढकाल पक्षका लालमणि भट्टराईले चुनौती दिएका थिए। कांग्रेसले दुर्गा चापागाईंलाई अघि सारेको थियो।
जेठ १९ मा निर्वाचन चलिरहँदा मतदानस्थलमा विवाद भयो। मतदान बीचैमा रोकियो। खानेपानी चुनावको मुद्दा अदालत पुग्यो।
उच्च अदालत विराटनगरमा खानेपानी चुनावबारे मुद्दा विचाराधीन रहेकै बेला मोरङ एमालेभित्र भने त्यही चुनावले ठूलो कलह निम्त्यायो।
ऋषिकेश पोखरेल, बाबुराम कार्की सहितका संस्थापन पक्षका नेताहरूले ‘खानेपानीमा पार्टीका आधिकारिक उम्मेदवारविरूद्ध गतिविधि गरेको’ भन्दै विराटनगर महानगर एमाले अध्यक्ष सागर थापा, उपसचिव नवराज नेपाल र खानेपानीका उम्मेदवार लालमणि भट्टराईलाई पार्टीको साधारण सदस्यसमेत नरहने गरी निष्कासन गरे।
जिल्ला कमिटीले गरेको निर्णयलाई घनश्याम खतिवडा नेतृत्वको प्रदेश कमिटीले पनि सदर गर्यो। कारबाहीमा परेका तीनै जना कार्यकर्ता विनोद ढकाल पक्षका हुन्।
खानेपानीको यही विवाद तन्किएर गएको फागुनको जिल्ला अधिवेशनमा पनि आइपुग्यो। विनोद ढकाल समूहले ‘मानगढमा भएको अन्यायविरूद्ध जिल्ला अधिवेशनले न्याय गर्ने’ नारा लगाएको थियो।
नभन्दै अजम्बर राई नेतृत्वमा खडा भएको ढकाल प्यानलबाट सागर थापाले उपाध्यक्ष जिते। आफूलाई कारबाहीको सिफारिस गर्ने शान्ति लिम्बूलाई नै थापाले हराए। पदाधिकारीसहित बहुमत सदस्य ढकाल पक्षले जित्यो।
त्यसबेला सागर थापाले ‘नेताले कारबाही गरे पनि कार्यकर्ताले न्याय गरेको’ अभिव्यक्ति दिएका थिए।
त्यसपछि महानगरमा पनि ढकाल पक्षले एकपक्षीय नतिजा निकाल्यो।
यसबीचमा उच्च अदालत विराटनगरले पुरानै उम्मेदवार र मतदाता सहभागी गराएर खानेपानी निर्वाचन फेरि गर्न आदेश दिएको थियो। शनिबार मतदान भएपछि सोमबार निर्वाचन नतिजा आउँदा गत वर्ष पार्टीले कारबाही गरेका लालमणि भट्टराई र उनको प्यानलका धेरै उम्मेदवार विजयी भए।
‘पार्टीमा भएको शक्ति दुरूपयोग गरेर हामीलाई त्यसबेला कारबाही गर्नेहरूले लगातार कार्यकर्ता र मतदाताबाट झट्का सहेका छन्,’ अहिले जिल्ला उपाध्यक्ष रहेका थापाले भने, ‘हामी गलत थिएनौं भन्ने पुष्टि भएको छ।’
वर्ष दिनअघि साधारण सदस्यबाटै एमालेले हटाएका भट्टराईले १ हजार ८८९ मत प्राप्त गरेर एमालेकै अर्का उम्मेदवार घिमिरेलाई हराए। घिमिरेले १ हजार १५४ मत पाए भने कांग्रेसकी दुर्गा चापागाईंले ६३५ मत प्राप्त गरेका छन्। ५ हजार ९८८ मतदाता भएको खानेपानीमा ३ हजार ९६४ मत मात्रै खसेको थियो।
पार्टीको जिल्ला, महानगर, मोरङका अरू स्थानीय पालिका कमिटीमा आफू पक्षीय उम्मेद्वारलाई पार्टी नेतृत्वमा जिताएका विनोद ढकाल अध्यक्ष केपी ओली पक्षमै रहेका नेता हुन्। तर, लामो समयदेखि ओली पक्षबाट किनारामा पारिएका उनलाई जिल्लामा शक्ति देखाएपछि अध्यक्ष ओलीले बालुवाटारमै बोलाएर ढकालसँग भेटेका थिए।
