लोकतान्त्रिक समाजवादी पार्टीका अध्यक्ष महन्थ ठाकुरले जनताले चाहे अहिलेको सत्ता एकछिनमै ढल्ने बताएका छन्।
शनिबार कैलालीको घोरोघोरास्थित सुखडमा संघीय लोकतान्त्रिक मोर्चाले गरेको वर्तमान राजनीतिक अवस्था बारे जनजागरण अभियान' कार्यक्रममा बोल्दै ठाकुरले जनताले चाहे सरकार तत्काल ढल्ने बताएका हुन्।
'जनताले अस्वीकार गरेर राजतन्त्र ढल्न सक्छ भने अहिलेको शासनसत्ता पनि जनताले चाह्यो भने एकछिनमा ढालिदिन सक्छ,' उनले भने।
संघीयता आए पनि अधिकार नपाएको उनले बताए। मोर्चा त्यसकै लागि संघर्ष गर्न बनेको बताए।
कार्यक्रममा बोल्दै नागरिक उन्मुक्ति पार्टीका संरक्षक रेशम चौधरीले थारु-मधेसी लगायत सबै उत्पीडितहरुको एकताको निम्ति मोर्चा गठन गर्नु परेको बताए।
'यसपालि रुपन्देहीमा हुने उपनिर्वाचन मोर्चाको परिक्षा हो। जसरी पनि जित्नुपर्छ,' उनले भने। थारु भएकै कारण आफुहरुसंग अन्याय र विभेद भएको उनले बताए।
कार्यक्रममा बोल्दै राष्ट्रिय मुक्ति पार्टीका महासचिव केशव झाले औपनिवेशिक सरकारको रवैयाले तीन करोड नेपाली जनता कोही खुशी नरहेको उनले बताए।
धेरै मिहिनेत पश्चात् उत्पीडित जनताहरुको चाहना अनुसार मोर्चा गठन भएकोले कसैले कमजोर बनाउने षड्यन्त्र गर्न नहुने उनले बताए। राजनीति स्थिरता, अधिकार पहिचान सहितको संविधान संशोधन, आर्थिक उन्नतिको निम्ति मोर्चा अपरिहार्य रहेको बताए।
कार्यक्रममा बोल्दै जनता समाजवादी पार्टी नेपालका उपाध्यक्ष विद्युत बज्राचार्यले २५०/३०० वर्षदेखि शासकवर्गले हामी उत्पीडित समुदायलाई विभाजन गरेर शासन गरिरहेकोले पहिचान पक्षधर एकठाँउमा उभिन मोर्चा गठन गरेको बताए ।
कार्यक्रममा बोल्दै जनता प्रगतिशील पार्टीका नेता उपेन्द्र उपाध्यायले देशमा भ्रष्टाचार र कुशासन बढेकोले त्यसको अन्त्यको निम्ति मोर्चा गठन गरेको बताए।
कार्यक्रममा थारु सँस्कृती झल्काउने विभिन्न नृत्यहरु प्रस्तुत गरिएको थियो। मोर्चाले देशव्यापी रुपमा जनजागरण अभियान संचालन गरिरहेको छ।
-1746009348.jpg)
