नेपाल महिला संघका संस्थापक मंगलादेवी सिंहको २९ औं स्मृति दिवस मनाइएको छ।
स्मृति दिवसको सन्दर्भमा आज शोभा भगवती डल्लु र बुद्धनगरमा रहेको सिंहको शालिकमा माल्यार्पण गरी श्रद्धाञ्जली अर्पण गरिएको हो।
मंगलादेवी सिंहका छोरासमेत रहेका उपप्रधानमन्त्री तथा सहरी विकास मन्त्री प्रकाशमान सिंहले शालिकमा माल्यार्पण गरे।
माल्यार्पणपछि सञ्चारकर्मीसँग कुरा गर्दै उपप्रधानमन्त्री सिंहले नेपाली महिलाको हक, अधिकारका लागि आवाज उठाउने पहिलो महिला मंगलादेवी सिंह भएको बताउँदै अहिले संविधानमा रहेको समावेशी, समानुपातिक प्रतिनिधित्व र नीतिगत तहमा महिला प्रतिनिधित्व मंगलादेवीकै नेतृत्वमा भएको आन्दोलनको उपलब्धि भएको बताए।
‘महिलाहरूको हकहितका लागि जहानिया राणा शासकहरूविरूद्ध आन्दोलन गर्नु आफैमा जोखिमपूर्ण काम थियो। त्यतिबेला ‘महिलाहरूलाई शिक्षामा हक, नीतिगत तहमा प्रतिनिधित्व र पैतृक सम्पत्तिमा हक स्थापित गर्न राणा शासनको त्यो असहज बेलामा मंगलामाको नेतृत्वमा भएको आन्दोलनको महत्त्वपूर्ण भूमिका छ,’ उनले भने।
महिला संघ, प्रदेश र स्थानीय तहसहित विभिन्न निकायमा महिला प्रतिनिधित्व अनिवार्य हुनुमा त्यतिबेलाको आन्दोलनको देन रहेको उनले बताए।
सत्याग्रह, जनआन्दोलनका बेलामा पनि सिंहले महत्त्वपूर्ण भूमिका निर्वाह गरेको उनले चर्चा गरेका थिए।
कार्यक्रममा मंगलादेवी फाउन्डेसनकी अध्यक्ष सिर्जना सिंहले मंगलादेवी सिंह नेपाली महिलाहरूका लागि प्रेरणा रहेको बताइन्। महिलाको हक, अधिकारलाई सुरक्षित बनाउनका लागि २००४ साल साउन २४ गते मंगलादेवी सिंहको अध्यक्षतामा महिला भेला भई महिला संघ स्थापना भएको थियो।
-1756118929.jpeg)
-1746009348.jpg)
