तीनजना नर्ससहित ५ जना कर्मचारीमा कोरोना देखिएपछि भरतपुर सेन्ट्रल अस्पतालले केही दिनका लागि सेवा बन्द गरेको छ।
स्वास्थ्यकर्मीमा कोरोना संक्रमण पुष्टि भएपछि स्वास्थ्यकर्मीहरू जोखिममा रहेको भन्दै तत्कालका लागि सेवा बन्द गरिएको अस्पतालका डाक्टर अनिलविक्रम कार्कीले बताए।
डा.कार्कीकाअनुसार स्वास्थ्यकर्मीमा कोरोना संक्रमण देखिएपछि तीन जना बिरामीको शल्यक्रिया प्रभावित बनेको छ।
‘तीन जना बिरामीको अप्रेसनको तयारी भइरहेको थियो, त्यही वार्डका नर्समा कोरोना पोजेटिभ देखियो’, उनले भने, ‘तत्कालका लागि स्थगित गरेका छौं।’
नेपाल चिकित्सक संघका केन्द्रीय उपाध्यक्षसमेत रहेका डा.कार्कीले अहिले नै निजी अस्पताल बन्द हुने अवस्थामा पुगेको भन्दै निजी अस्पतालमा कोरोना संक्रमितको उपचार गराउँदा जोखिम बढ्ने बताए।
‘सरकारले त्यो निर्णय फिर्ता लिनुपर्छ, कुनै एक स्थान छनोट गरेर कोरोना संक्रमितको उपचार गर्ने व्यवस्था मिलाउनुपर्छ’, उनले भने, ‘सबै बिरामीलाई एकै ठाउँमा राखेर उपचार गर्दा अन्य बिरामी पनि जोखिममा पर्ने भए, यसले भयावह अवस्था निम्त्याउँछ।’
सोमबार राती प्राप्त विवरणअनुसार चितवनमा थप ५० जनामा कोरोना संक्रमण पुष्टि भएको छ। उनीहरूमध्ये ४ जना जिल्ला बाहिरका हुन्। उनीहरू यहाँका विभिन्न अस्पतालमा उपचाररत र कार्यरत थिए।
अहिलेसम्म चितवनका २ सय ५५ जनामा कोरोना पुष्टि भइसकेको छ।
