नापी कार्यालय कलंकीका सर्भेक्षक लक्ष्मीप्रसाद चौलागाईं र राजधानी लेखापढी सेवाका लेखापढी नेत्रबहादुर पोखरेलविरूद्ध भ्रष्टाचारको मुद्दा दायर भएको छ।
अख्तियार दुरूपयोग अनुसन्धान आयोग टंगालले आइतबार विशेष अदालतमा उनीहरूविरूद्ध भ्रष्टाचारको मुद्दा दायर गरेको हो।
जग्गा कित्ताकाट गरी पुर्जा उपलब्ध गराउन सेवाग्राहीसँग घुस माग गरेको सूचना अख्तियारले पाएको थियो। उक्त सूचनाको आधारमा खटिएको टोलीले उनीहरूलाई एक लाख रुपैयाँ घुस लिइसकेको अवस्थामा पक्राउ गरेको थियो।
अनुसन्धानबाट उनीहरूले सेवाग्राहीबाट घुस लिएको र त्यसमध्ये सर्भेक्षक चौलागाईं र लेखापढी पोखरेलले ५०-५० हजार रुपैयाँ लिएको देखिएको प्रवक्ता नरहरि घिमिरेले जानकारी दिए।
चौलागाईंमाथि अख्तियारले भ्रष्टाचार निवारण ऐन, २०५९ को दफा ३ को उपदफा १ को (ख) बमोजिम सजाय मागेको छ। उक्त दफामा २५ देखि ५० हजार रुपैयाँसम्म घुस लिनेलाई तीन महिनादेखि चार महिनासम्म कैद सजाय हुने व्यवस्था छ।
त्यस्तै लेखापढी पोखरेललाई सोही उपदफाको (ग) बमोजिम सजाय मागदाबी गरेको छ। चौलागाईंबाट ५० हजार असुल हुने गरी माग गरेपनि पोखरेलबाट भने एक लाख रुपैयाँ नै जरिवानाको माग गरेको छ।
त्यसअनुसार अख्तियारले पोखरेललाई चार महिनादेखि छ महिनासम्म कैद सजाय गर्न माग गरेको हो।
