प्रहरीले रूकुम पश्चिमबाट अफिमसहित दुई युवालाई पक्राउ गरेको छ।
आठबिसकोट नगरपालिका–२ स्यालाका ३५ वर्षीय अजय यरी र मुसिकोट नगरपालिका–९ बालचौरका ३६ वर्षीय भिमबहादुर वलीलाई पक्राउ गरेको जिल्ला प्रहरी प्रवक्ता प्रहरी निरीक्षक बखतबहादुर शाहीले जानकारी दिए।
उनका अनुसार असोज १८ गते मध्यराति चेकजाँच गर्दा उनीहरूको साथमा आठ केजी एक सय ग्राम अफिम फेला परेको थियो।
'मुसिकोटको सेरीगाउँदेखि ज्याम डाँडातर्फ पैदल हिँडिरहेका उनीहरूमाथि शंका लागि चेकजाँच गर्दा अफिम फेला परेको हो,' उनले भने।
यस्तै, प्रारम्भिक अनुसन्धानमा भिमबहादुरले कारोबार गर्ने गरेको पाइएको प्रहरीको भनाइ छ।
भिमबहादुरले दाङको तुलसीपुर क्षेत्रमा पनि धेरै पटक लागुऔषध लगेर भारतीयलाई बिक्री वितरण गर्ने गरेको खुलेको समेत प्रहरी निरिक्षक शाहीले बताए।
घटनाबारे थप अनुसन्धान भइरहेको प्रहरीले जनाएको छ।
