सरकारले सञ्चालन गरेको पाठेघरको मुखको क्यान्सर विरूद्धको एचपिभी खोप अभियानमा करिब ९२ प्रतिशत किशोरीले खोप लगाएका छन्।
स्वास्थ्य सेवा विभागका बाल स्वास्थ्य तथा खोप शाखा प्रमुख डा. अभियान गौतमका अनुसार अभियानका क्रममा ९२ किशोरीले खोप लगाइसकेका छन्। गत माघ २२ गतेदेखि सुरू भएको खोप अभियान मंगलबार सकिएको छ।
गौतमका अनुसार १४ लाख २८ हजार आठ सय ८९ किशोरीले अभियानका बेला खोप लगाएका छन्। अभियानमा १६ लाख ८८ हजार सात सय ८६ किशोरीलाई खोप लगाउने लक्ष्य राखिएको थियो।
खोप लगाउन छुट भएका किशोरीलाई स्वास्थ्य संस्थामा लगाइने समेत उनले जानकारी दिए।
'कुनै समुदायमा छुट भएका किशोरीलाई त्यही गएर खोप लगाएका छौं,' उनले भने, 'मधेसतिर खोप लगाउन छुटेका एकै समुदायका एक सय ५० जना किशोरीलाई पनि हामीले खोप लगाइएको छौं। समुदायमा गएर खोजेर खोप लगाइने छ।'
शाखा प्रमुख डा. गौतमले मनाङ, मुस्ताङ, हुम्ला र डोल्पामा विद्यालय सञ्चालन नभएको खोप अभियान सुरू नगरिएको बताए।
उनका अनुसार स्कुल सुरू हुनासाथ फागुनको तेस्रो सातामा ती जिल्लामा खोप अभियान चल्नेछ। सरकारले किशोरीहरूलाई पाठेघरको मुखको क्यान्सरबाट बचाउन कक्षा ६ देखि १० सम्म र विद्यालय बाहिर रहेका १० देखि १४ वर्ष उमेर समूहका लागि खोप अभियान सञ्चालन गरेको थियो।
नेपालमा हरेक दिन पाठेघरको मुखको क्यान्सरबाट चार जना महिलाको मृत्यु हुने गरेको तथ्यांक छ।
