ललितपुरको इमाडोलमा एक जना किशोरीको मृत्यु भएको छ।
महालक्ष्मी नगरपालिका-३ बोझेपोखरी बस्ने १८ वर्षीया किशोरीको मृत्यु भएको जिल्ला प्रहरी परिसर ललितपुरका एसपी चक्रराज जोशीले जानकारी दिए।
बुधबार किशोरीको ग्वार्कोस्थित किष्ट अस्पतालमा पुर्याउँदा मृत्यु भइसकेको थियो।
प्रहरीका अनुसार ती किशोरी बुधबार दिउँसो १२ बजेतिर आफ्ना प्रेमी बोझेपोखरीमा बस्ने १८ वर्षीय किशोरको घर गएका थिए।
उनीहरू सामाजिक सञ्जालमार्फत चिनजान भई केही महिनायता प्रेम सम्बन्धमा रहेको प्रहरीले बताएको छ। किशोरी पहिलो पटक प्रेमीको घर पुगेकी थिइन्।
दुई जना कोठामा बसिरहँदा किशोरी दिउँसो २ बजेतिर अचानक बेहोस भएकी थिइन्। बेहोस भएपछि ती किशोरले आफ्ना बुबालाई खबर गरेका थिए।
खबर गरेपछि किशोरीलाई किष्ट अस्पताल पुर्याइएको थियो। त्यहाँ पुर्याएपछि चिकित्सकले किशोरीलाई मृत घोषणा गरेका हुन्।
अस्पताल प्रशासनका अनुसार किशोरीलाई २:४८ मा अस्पताल ल्याइएको थियो। उनलाई ल्याउँदा नै मृत्यु भइसकेको अस्पतालका चिफ अपरेटिङ अफिसर अमिस पाठकले जानकारी दिए।
अहिले किशोर प्रहरी वृत्त सातदोबाटोको नियन्त्रणमा छन्। उनीमाथि घटनाबारे सोधपुछ भइरहेको छ।
मृत्युको कारण यकिन नभएको एसपी जोशीले बताए।
‘मृत्युको कारण खुलेको छैन। पोष्टमर्टम रिपोर्ट आएपछि मात्रै थाहा हुन्छ,’ उनले भने।
शव पोष्टमर्टमको लागि महाराजगन्जस्थित टिचिङ अस्पताल लगिएको छ।
घटनाबारे प्रहरीलाई किशोरी अस्पतालमा पुर्याइसकेपछि खबर भएको थियो। उक्त घटनापछि प्रहरी घटनास्थल र अस्पताल समेत पुगेको थियो। घटनास्थलबाट प्रहरीले किशोरीले दिएको लभ-लेटर पनि फेला पारेको छ।
प्रहरी वृत्त सातदोबाटो र परिसरको टोलीले यस घटनाको अनुसन्धान गरिरहेको बताएको छ।
-1746009348.jpg)
