रोजर फेडेरर वर्षको पहिलो ग्राण्डस्लाम टेनिस प्रतियाेगिता अष्ट्रेलियन ओपनको क्वाटरफाइनलमा प्रवेश गरेका छन्। सोमबार भएको चौथो चरणको खेलमा हंगेरीका मार्टन फ्यूसोभिक्सलाई पराजित गर्दै फेडेरर प्रतियोगिताको अन्तिम आठमा पुगेका हुन्।
कीर्तिमानी १९ पटकको ग्राण्डस्लाम फेडेररले १४ औं पटक अष्ट्रेलियन ओपनको क्वाटरफाइनलमा स्थान बनाएका हुन्। मेलबर्नपार्क स्थित रोड लाभेर एरिनामा भएको खेलमा स्विस फेडेररले फ्यूसोभिक्सलाई ६ – ४ , ७ – ६ र ६ – २ ले पराजित गरे।
गत वर्षका च्याम्पियन समेत रहेका फेडेररले क्वाटरफाइनलमा चेक रिपब्लिकका थोमस बर्डिजसँग खेल्ने छन्। १९ औं वरियताका बर्डिजले इटालीका फाबियो फोगिनीलाई ६ – १, ६ – ४ र ६ – ४ को सेटमा हराएर क्वाटरफाइनलमा स्थान पक्का गरेका थिए।
अष्ट्रेलियन ओपनको क्वाटरफाइनलमा पुगेसँगै पाँच पटकको च्याम्पियन ३७ वर्षीय फेडेरर सन् १९७७ पछि अन्तिम आठमा पुग्ने सबैभन्दा बढी उमेरका खेलाडी पनि बनेका छन्।
