विश्वकप छनोटमा स्थान बनाएको तथा भर्खरै एसिसी प्रिमियर कप जितेर एसिया कपमा स्थान पक्का गरेर ऐतिहासिक सफलता चुमेको नेपाली राष्ट्रिय क्रिकेट टोलीलाई आज विराटनगरमा सम्मानसहित नगर परिक्रमा गराइँदैछ।
कोशी प्रदेशको राजधानीस्थित उद्योगी व्यवसायीहरूका तीन वटा संघ–संगठनहरूले संयुक्त रूपमा राष्ट्रिय क्रिकेट टिमको सम्मान गर्ने भएका हुन्।
नेपाल उद्योग वाणिज्य महासंघ कोशी प्रदेश समिति, मोरङ व्यापार संघ तथा उद्योग संगठन मोरङले संयुक्त रूपमा खेलाडीहरूको सम्मान गर्ने भएका हुन्।
‘विराटनगरका ‘लोकल ब्वाई’ ललित राजवंशीसहितका टिमका सबै खेलाडी विराटनगर आउँदैछन्’, उद्योग वाणिज्य महासंघ प्रदेशका कार्यकारी निर्देशक श्याम भण्डारीले भने, ‘आज पौने १२ बजेदेखि खेलाडीहरूलाई सम्मानस्वरूप नगर परिक्रमा गराइनेछ। त्यसपछि सम्मान गरिनेछ।’
लिग २ का १२ मध्ये ११ खेल जितेर जिम्बावे यात्रा निश्चित गरेको नेपालले त्यहाँ विश्वकप छनोट खेल्नेछ। वेस्ट इन्डिज, श्रीलंका, जिम्बावे, आयरल्याण्ड, नेदरल्याण्ड्स, स्कटल्याण्ड, ओमान, अमेरिका र युएईले छनोट खेल्नेछन्।
यसैगरी अघिल्लो साता घरेलु मैदानमा एसिसी प्रिमियर कप जितेर नेपालले एसिया कपमा स्थान पक्का गरेर भारत र पाकिस्तान जस्ता क्रिकेटका पावर हाउस टोलीसँगको भेट निश्चित गरेको थियो।
1678972840.jpg)
