विश्वकप छनोटमा स्थान बनाएको तथा भर्खरै एसिसी प्रिमियर कप जितेर एसिया कपमा स्थान पक्का गरेर ऐतिहासिक सफलता चुमेको नेपाली राष्ट्रिय क्रिकेट टोलीलाई विराटनगरमा सम्मानसहित नगर परिक्रमा गराइएको छ।
राष्ट्रिय क्रिकेट टिमलाई सम्मानसहित विराटनगर परिक्रमा गराउन विराटनगर विमानस्थलमा समर्थकको भिड लागेको थियो। विमानस्थलबाट नगर परिक्रमा सुरू गरिएको हो।
कोच मोन्टी देसाई, कप्तान रोहित पौडेल, सोमपाल कामी, ज्ञानेन्द्र मल्ल, लोकलब्वाइ ललितसहितका खेलाडीहरू सहभागी छन्।
कोशी प्रदेशको राजधानीस्थित उद्योगी व्यवसायीहरूका तीन वटा संघ–संगठनहरूले संयुक्त रूपमा राष्ट्रिय क्रिकेट टिमको सम्मान गरेका हुन्।
नेपाल उद्योग वाणिज्य महासंघ कोशी प्रदेश समिति, मोरङ व्यापार संघ तथा उद्योग संगठन मोरङले संयुक्त रूपमा खेलाडीहरूको सम्मान गरेका हुन्।
लिग २ का १२ मध्ये ११ खेल जितेर जिम्बावे यात्रा निश्चित गरेको नेपालले त्यहाँ विश्वकप छनोट खेल्नेछ। वेस्ट इन्डिज, श्रीलंका, जिम्बावे, आयरल्याण्ड, नेदरल्याण्ड्स, स्कटल्याण्ड, ओमान, अमेरिका र युएईले छनोट खेल्नेछन्।
यसैगरी अघिल्लो साता घरेलु मैदानमा एसिसी प्रिमियर कप जितेर नेपालले एसिया कपमा स्थान पक्का गरेर भारत र पाकिस्तान जस्ता क्रिकेटका पावर हाउस टोलीसँगको भेट निश्चित गरेको थियो।
तस्बिरहरू: राजु अधिकारी
1683704708.jpg)
