रियल मड्रिडलाई हराउँदै टोटनह्याम अन्तिम १६ मा

विम्बले, कात्तिक १६

इंग्लिस क्लब टोटनह्याम साबिक विजेता स्पेनिस क्लब रियल मड्रिडलाई हराउँदै च्याम्पियन्स लिग फुटबलको अन्तिम १६ मा स्थान बनाउन सफल भएको छ। टोटेनहामले डिफेन्डिङ च्याम्पियन रियल म्याड्रिडलाई ३–१ गोलले हराएको हो।

इंग्ल्यान्डको विम्बलेमा बिहिबार बिहान सम्पन्न समूह ‘एच’ को खेलमा डाले अलीको २ तथा क्रिस्टियन इरिक्सनले १ गोल गरेपछि टोटेनहामले डिफेन्डिङ च्याम्पियनलाई स्तब्ध बनाएको हो।

म्याड्रिडका लागि ८०औं मिनेटमा क्रिस्टियानो रोनाल्डोले एक गोल फर्काए। यसअघि घरेलु टोलीले खेलको २६औं मिनेटमा अलीको गोलबाट अग्रता लिएको थियो। पहिलो हाफ १-०ले पछि परेको मड्रिड दोस्रो हाफको ५६औं मिनेट थप एक गोल खाँदै गोल अन्तर २-० पुग्यो। ६५ मिनेटमा इरिक्सनले तेस्रो गोल थपेका थिए।

अघिल्लो संस्करणमा समूह चरणबाट बाहिरिएको इंग्लिस टोली बिहिबारको जितपछि ४ खेलबाट १० अंक बटुल्दै नकआउट चरणमा प्रवेश गरेको छ।

म्याड्रिडको भने यो खेलबाट दोस्रो चरणमा प्रवेश गर्ने आशा पुरा हुन सकेन्।

टोटेनहामले छैटौं प्रयासमा म्यड्रिडलाई पराजित गरेको हो। यसअघि ५ खेलमा ऊ म्याड्रिडसँग पराजित हुँदै आइरहेको थियो। २०१२ यता च्याम्पियन्स लिगको समूह चरणको खेलमा म्याड्रिड पहिलो पटक पराजित पनि भएको हो। उसको ३० खेलको अपराजित यात्रा पनि टुंगिएको छ। युभेन्ट्ससँग २००८ मा २–० ले पराजित भएपछि म्याड्रिडको समूह चरणको खेलमा यो सबैभन्दा धेरै गोल अन्तरको पराजय हो।

जितपछि दुई खेल बाँकी हुँदै अन्तिम १६ मा स्थान बनाएको टोटनह्यामले १० अंक भएको छ भने दोस्रो स्थानको रियल मड्रिडको सात अंक छ । समूह ‘एच’ कै खेलमा बोरुसिया डर्टमुण्डले एमोइल निकोशियासँग १–१ को बराबरी खेल्यो ।