रियल म्याड्रिडले सेल्टा भिगोमाथि गोल वर्षा गरेको छ।
स्पेनिस ला लिगा फुटबल अन्तर्गत शनिबार राति भएको खेलमा रियल मड्रिडले शानदार जित निकाल्ने क्रममा सेल्टा भिगोलाई ६-० गोलले पराजित गरेको हो।
घरेलु मैदानमा भएको खेलमा मड्रिडले सेल्टा डी भिगोमाथि आधा दर्जन गोल गरेको हो ।
रियलले पहिलो हाफमा तीन तथा दोस्रो हाफमा तीन गोल गरेको हो । उसका लागि ग्यारेथ बेलले दुई तथा इस्को, हाकिमी र टोनी क्रसले एक एक गोल गरे । सेल्टाका गोमेजले आत्मघाती गोल गरे ।
खेलको १३ औँ मिनेटमा बेलले गोल गर्दै घरेलु टोलीलाई सुरुवाति अग्रता दिलाएका थिए। ३० औं मिनेटमा बेलले व्यक्तिगत दोस्रो गोल गरेपछि अग्रता दोब्बर पुग्यो। ३२औं मिनेटमा इस्कोले गोल गर्दै रियललाई पहिलो हाफमा ३–० को अग्रता दिलाए।
आक्रफ हाकिमीले ५२ औँ मिनेटमा गोल गर्दै अग्रता ४–० मा पुर्याए। सेल्टाका सेर्गी गोमेजले ७४ औँ मिनेटमा आत्मघाती गोल गरेपछि ५-० मा पुगेको रियलको अग्रता ८१ औँ मिनेटमा क्रुसले गोल गरेपछि रियल मड्रिड ६–० ले विजयी भयो।
जितपछि तेस्रो स्थानको रियलको लिगको एक खेल बाँकी हुँदा ७५ अंक भएको छ। यो खेलमा चोटका कारण स्टार स्ट्राइकर क्रिष्टियानो रोनाल्डो खेल्न पाएका थिएनन् ।
दोस्रो स्थानको एथ्लेटिको मड्रिडको एक खेल बाँकी हुँदा ७८ अंक भएको छ। उसले शनिबार राति भएको खेलमा गेटाफेलाई १–० ले हरायो।
