जावलाखेल युथ क्लब ए डिभिजन लिगको शीर्ष स्थानमा फर्किएको छ। बिहीबार फ्रेन्ड्स क्लबलाई ४-१ गोलले पराजित गर्दै जावलाखेल शीर्ष स्थानमा उक्लिएको हो।
जावलाखेलको १७ खेलबाट ३० अंक छ। १६ खेलबाट ३० अंक नै जोडेको चर्च ब्वाइज युनाइटेड हेड टु हेडमा पछि रहेकाले दोस्रो स्थानमा झरेको छ। फ्रेन्ड्स भने १९ अंक जोडेर एघारौं स्थानमा छ।
च्यासल मैदानमा भएको खेलमा जावलाखेलका एनकोटो मोसाबीले दुई गोल गरे। उनले खेलको २६ पहिलो गोल गर्दा ६३ मिनेटमा पेनाल्टीमा व्यक्तिगत दोस्रो गोल गरे।
त्यसअघि खेलको २० मिनेटमा राहुलको गोलबाट जावलाखेल अग्रता लिएको थियो।
जावलाखेलका लागि फेडे फोफनाले दोस्रो हाफको इन्जुरी टाइमको पहिलो मिनेटमा चौथो गोल गरे।
फ्रेन्ड्सका श्याम क्याप्छाकीले ८० मिनेटमा गरेको गोल सन्त्वनामा सीमित बन्यो।
