सहिद स्मारक ए डिभिजन लिगको उपाधि होडमा रहेको मछिन्द्र क्लबलाई धक्का लागेको छ।
आइतबार च्यासल मैदानमा भएको खेलमा नेपाल पुलिस क्लबसँग २-१ गोलले पराजित भएपछि साविक विजेता मछिन्द्रको उपाधि जित्ने सम्भावना कमजोर भएको हो।
खेलमा मछिन्द्रले अग्रता लिए पनि जोगाउन सकेन। मछिन्द्रका लागि ओलावालेले २७ मिनेटमा गोल गरेका थिए।
पुलिसका लागि दुवै गोल मोसेसले गरे। उनले खेलको ७५ र ८१ मिनेटमा गोल गरेपछि मछिन्द्र स्तब्ध बन्यो।
पराजित भएसँगै अन्तिम दुई खेल बाँकी रहदा मछिन्द्रको ३९ अंक छ। शीर्ष स्थानको चर्च ब्वाइजले ५ अंकको अग्रता लिँदै ४४ अंक जोडेको छ।
अब चर्च ब्वाइजले बाँकी रहेको दुई खेलमा एक अंक जोडे ए डिभिजन लिग खेलेको पहिलो सिजनमै उपाधि जित्नेछ।
मछिन्द्रले दुवै खेल जितेर चर्च ब्वाइजसँग अंक बराबरी गरे पनि हेड टु हेडमा चर्च ब्वाइज अगाडि छ। दुई लेग मध्ये पहिलो लेग बराबरीमा सकिँदा दोस्रो लेगमा चर्च ब्वाइज विजयी भएको थियो।
चर्च ब्वाइजले अब थ्रीस्टार र खुमलटारसँग खेल्न बाँकी छ। यी दुवै खेलमा चर्च ब्वाइज पराजित भएको अवस्थामा मात्र मछिन्द्रको उपाधि सम्भावना हुनेछ। मछिन्द्रले अब मनाङ मर्स्याङ क्लब र हिमालयन शेर्पासँग खेल्न बाँकी छ।
यता जितसँग चौथो स्थानको पुलिसले ३७ अंक जोडेको छ।
