एएफसी यू-२० च्यम्पियनसिपअन्तर्गत दोस्रो चरणको छनोटमा नेपालले खराब सुरूवात गरेको छ। मंगलबार घरेलु टिम म्यानमारसँग नेपाल ५-० गोलले पराजित हुँदा खराब सुरुवात गरेको हो।
युवुन्ना स्टेडियममा म्यानमारका लागि खेलको २३औँ मिनेटमा जिन मोई प्याएले पहिलो गोल गरिन्। म्यानमारकी अर्की खेलाडी यिन लुन इयानले ह्याट्रिक पूरा गरिन्। उनले खेलको ४४औँ, ४७औँ र ९०औँ मिनेटमा गोल गर्दै ह्याट्रिक पूरा गरेकी हुन् ।
यसैगरी युन वादी हलाइङ्गले खेलको ६९औँ मिनेटमा एक गोल थपिन् । अब नेपालले आफ्नो दोस्रो खेल यही जेठ २५ गते चीनसँग खेल्नेछ । नेपाल छनोटको समूह ‘बी’ मा रहेको छ । नेपालको समूहमा म्यानमार, चीन र चाइनिज ताइपेइ रहेका छन् ।
नेपाल यसअघि प्यालेस्टाइनमा भएको पहिलो चरणको खेलमा घरेलु टोली प्यालेस्टाइन र उत्तरी मरियाना आइल्यान्डलाई समान ६–० गोल अन्तरले हराउँदै दोस्रो चरणमा प्रवेश गरेको थियो ।
