भारतमा जारी १४औं साफ च्याम्पियनसिपको अन्तिम खेलमा नेपालले पाकिस्तानविरूद्ध १-० गोलको जित निकालेको छ।
समूह चरणको अन्तिम खेलमा जित निकाले पनि नेपाल प्रतियोगिताको समूह चरणबाट बाहिरिसकेको छ। यसअघि कुवेत र भारतसँगको दुबै खेल हारेसँगै नेपाल समूह चरणबाट बाहिरिसकेको हो।
पहिलो खेलमा कुवेतसँग ३-१ र दोस्रो खेलमा भारतसँग २-० गोल अन्तरले पराजित नेपाल २०१५ यता पहिलोपटक समूह चरणबाटै बाहिरिहेको हो।
समूह चरणको अन्तिम खेलमा भने आज नेपालले पाकिस्तानविरूद्ध १-० गोलको सान्त्वना जित निकाल्दै च्यापियनसिपको यो संस्करण सकाएको छ।
नेपालको जितका लागि आशिष चौधरीले दोस्रो हाफको ७८ औं मिनेटमा गोल गरेका हुन्। योसँगै आशिष आफ्नो पहिलो अन्तर्राष्ट्रिय डेब्यू खेलमै गोल गर्न सफल भए।
