नेपाली महिला राष्ट्रिय फुटबल टिमले बंगलादेशसँग आज दोस्रो मैत्रीपूर्ण खेल खेल्दैछ।
खेल बंगलादेशको राजधानी ढाकाको कमलपुरस्थित सहिद सिपाही मोहमद मुस्ताफा कमल रंगशालामा साँझ सवा पाँच बजे सुरु हुनेछ।
यसअघि घरेलु टिम बंगलादेशविरूद्धको पहिलो मैत्रीपूर्ण खेलमा नेपाली महिला राष्ट्रिय फुटबल टिमले एक एक गोलको बराबरी खेलेको थियो।
इन्जुरी टाइमको दोस्रो मिनेटमा सावित्रा भण्डारी साम्बाले गोल गरेपछि नेपालले सम्भावित हार टारेको थियो।
नेपाली राष्ट्रिय टिम अहिले एसियन गेम्सको तयारीमा छ। चीनमा सेप्टेम्बर-अक्टोबरमा हुने एसियन गेम्सको तयारीका लागि नेपालले मैत्रीपूर्ण खेल खेलेको हो।
नेपाल र बंगलादेशबीच गत वर्षको साफ च्याम्पियनसिपपछि पछिल्लो पटक प्रतिस्पर्धा भएको थियो।
साफको फाइनलमा नेपालमाथि बंगलादेशले ३-१ गोलको जित निकाल्दै उपाधि जितेको थियो।
