अञ्जली चन्द र सबिना चौधरीले भुटानको क्लबबाट खेल्ने भएका छन्। नेपालको यू-२० राष्ट्रिय टोलीबाट खेलिसकेका दुवै भुटानको चर्चित क्लब थिम्पु सिटी एफसीमा आबद्ध भएका हुन्।
उनीहरूले बीओबी भुटान महिला राष्ट्रिय लिग २०२५ मा प्रतिस्पर्धा गर्नेछन्। यी दुई खेलाडीले अक्टोबर २०२५ को अन्त्यसम्मका लागि सम्झौता गरेका छन्।
थिम्पु सिटी एफसी हाल लिग तालिकामा गोलअन्तरको आधारमा चौथो स्थानमा छ र उसले आफ्ना सुरुवाती दुवै खेलमा जित हात पारेको छ।
क्लबले दुवै खेलाडीलाई व्यावसायिक सम्झौताअनुसार आउने-जाने हवाई टिकट, पूर्ण आवास सुविधा र मासिक तलब उपलब्ध गराउनेछ। वर्क परमिट र भिसा लगायतका सबै आवश्यक कागजी प्रक्रिया सफलतापूर्वक सम्पन्न भइसकेको छ।
अञ्जलीले मिडफिल्डर/विङ्गरको रूपमा खेल्नेछिन् भने सबिना चौधरीले राइट-ब्याक/डिफेन्डरको रूपमा खेल्नेछिन्।
फुटबल एजेन्ट तथा प्रशासक नबिन चित्रकारले दुवैको सम्झौतामा काम गरेका थिए।
‘नेपाली महिला खेलाडीलाई विदेश पठाउने यो मेरो पहिलो अवसर हो, र उनीहरूको व्यावसायिक यात्रामा सहयोग गर्न पाउँदा मलाई गर्व लागेको छ। हामी अञ्जली र सबिनालाई नेपालको प्रतिनिधित्व गर्दै थिम्पु सिटी एफसीलाई उपाधि जिताउने लक्ष्यमा सफलताको लागि शुभकामना दिन्छौं,’ चित्रकारले भने।
-1746009348.jpg)
