नेपाल फुटबल खेलाडी संघले नेपाली फुटबललाई चलायमान राख्न डिभिजन फुटबलको निरन्तरता दिने माग राख्दै अखिल नेपाल फुटबल संघ (एन्फा) का महासचिव किरण राई समक्ष मंगलबार ज्ञापन पत्र बुझाएको छ।
यो वर्ष गर्ने भनिएको ए डिभिजन लिगको मिति अझै घोषणा गरिएको छैन। खेलाडीले संघले लिगको मिति घोषणा गर्न आग्रह समेत गरेको छ।
संघका अध्यक्ष विक्रम लामासहित विकेश कुथु र विराज महर्जनले एन्फा महासचिव किरण राई बुझाएको ज्ञापन पत्रमा भनिएको छ, ‘पछिल्लो पटक ए डिभिजन लिग सम्पन्न भएको दुई वर्षभन्दा बढी समय बितिसक्दा पनि अर्को सिजन सुरुवातबारे अझै पनि अन्यौलता रहेको तथ्य पनि यहाँलाई जानकारी नै छ। यसै विषयमा नेपाली फुटबललाई चलायमान राख्न डिभिजन फुटबलको निरन्तरता दिने मागसहित गहिरो चिन्ता व्यक्त गर्न नेपाल फुटबल खेलाडी संघको तर्फबाट हामी यो ज्ञापन पत्र लेख्दै छौं। निरन्तरको अन्यौलताले खेलाडीहरू र हाम्रो देश भित्रको फुटबल समुदाय दुवैमा गम्भीर र प्रत्यक्ष असर पारेको छ।’
साथै फुटबल प्रतियोगिता नहुँदा खेलाडी पलायन भएको र छनोट प्रक्रियालाई समेत असर गरेको संघको भनाइ छ।
‘लिग फुटबलको अभावले खेलकुदमा आफ्नो जीवन समर्पित गरेका हाम्रा फुटबल खेलाडीहरूलाई अनिश्चित अवस्थामा पुर्याएको छ। हामीजस्तै प्रशिक्षक, रेफ्री र फुटबलकै भर गर्ने अन्य हजारौंको अवस्था पनि यस्तै होला। फुटबलको अभावकै कारण धेरै प्रतिभा जीविकोपार्जनको खोजीमा देश छोड्न बाध्य भएका छन् । यो पलायन केवल व्यक्तिगत प्रतिभाको क्षति मात्र होइन, यसले राष्ट्रिय फुटबललाई दिर्घकालिन हानि पुर्याउँछ । र अन्तर्राष्ट्रिय मञ्चमा पनि हाम्रो स्तरमा प्रत्यक्ष प्रभाव पार्दछ,’ संघको भनाइ छ।
‘पछिल्लो पटक राष्ट्रिय टोली छनोट प्रक्रिया गर्न खेलाडीलाई ट्रायलमा बोलाउनुपर्ने स्थितिले यस पक्षलाई अझ उजागर गरेको छ । राष्ट्रिय टोलीको छनोट प्रतिस्पर्धात्मक खेलबाट हुनुपर्ने हो र लिग फुटबल गर्नुबाहेकको विकल्प हामीसँग छैन।’
यस्तै खेलाडीका लगि प्रशिक्षढण र फिटनेसको पनि समस्या भइरहेको संघले जनाएको छ।
‘फुटबल गतिविधि नहुँदा खेलाडीहरूले सामना गर्ने आर्थिक कठिनाइले उनीहरूको प्रशिक्षण र फिटनेस कायम राख्ने क्षमतामा बाधा पुर्याइरहेको छ। व्यावसायिक विकासमा सम्झौता भइरहेको छ नै सँगसँगै आउने पिढीलाई पनि नराम्रो सन्देश गएको अनुभव हामीले गरेका छौं। यी समस्याहरूलाई मध्यनजर राख्दै हामी नेपाल फुटबल खेलाडी संघ फुटबल लिगको घोषणा र आयोजना गर्न तुरुन्तै कदम चाल्न अनुरोध गर्दछौं। लिगलाई पुनर्जीवित गर्नाले खेलाडी मात्र होइन फुटबलमा जोडिएका सबै पक्षलाई स्थिर बनाउनेछ। फुटबलमा लागेका व्यक्तिहरुलाई आवश्यक पर्ने आर्थिक सुरक्षा प्रदान गर्नेछ।हामीलाई विश्वास छ कि एन्फाले चाडो भन्दा चाडो सबै श्रेणीका सहभागी क्लबहरुसँग समन्वय गरेर फुटबल लिगको क्यालेन्डर अनुसार काम अघि बढाउनेछ। हामी यो विषयलाई उच्च प्राथमिकता दिन र हाम्रो खेलको भविष्य सुरक्षित गर्न द्रुत कदम चाल्न अनुरोध गर्दछौं,’ संघको भनाइ छ।
-1755004323.jpg)
-1746009348.jpg)
