पूर्व अर्जेन्टिनी स्टार डिएगो म्यारोडोनाले सोमबार राति लन्डनको एक भब्य समारोहमा मेसीलाई अवार्ड दिन नपाउँदा दुःख लागेको बताएका छन्। रियल म्याड्रिडका स्टार क्रिस्टियानो रोनाल्डोलाई फिफा उत्कृष्ट खेलाडी २०१७ को अवार्ड प्रदान गरिसकेपछि उनले लियोन मेसीलाई नभइ रोनाल्डोलाई अवार्ड दिनु परेकोमा आफू दुःखी भएको बताएका हुन्। अवार्डपछि म्यारोडोनाले भने,‘मेसीलाई नभएर रोनाल्डोलाई दिन पर्दा नरमाइलो लागेको छ । ’
लगातार दोस्रो पटक फिफा वर्ष खेलाडीको अवार्ड जितेका रोनाल्डोले अवार्डका लागि मेसी र नेयमारलाई पछि पारेका थिए।
म्यारोडोनाले मेसी सम्मिलित अर्जेन्टिनाको राष्ट्रिय फुटबल टोलीलाई सन् २००८ देखि २०१० सम्म प्रशिक्षण दिएका थिए। उनले अवार्डका दौरान मेसीलाई भेटेकासमेत थिए। आफूले मेसीसँगको भेटका बारेमा उनले भने,‘मेसीसँगको भेट उत्कृष्ट थियो । हामीले कुराकानी गर्यौं। हाम्राबीच अहिले पनि उस्तै छ जहिले पहिले हुने गर्थ्यो।’
मेसीले गत सिजन ३४ खेलमा ३७ गोल गरेका थिए। ३० वर्षे मेसीकै उच्च प्रदर्शनबाट प्रेरित अर्जेन्टिनाले इक्वेडरलाई पराजित गर्दै अर्को वर्ष रसियामा हुने फिफा विश्व कपका लागि स्थान सुरक्षित गरेको थियो।
-1746009348.jpg)
