कवि नवराज पराजुलीको विशेष प्रस्तुतिसहित लण्डनमा कविता कन्सर्ट हुने भएको छ।
नेप्लिज ब्रिटिस कम्युनिटी (एनबीसी) यूकेले आगामी मार्च १० तारिखका दिन द्वन्द्वपीडित बालबालिकाको सहयोगार्थ ‘लन्डन कविता कन्सर्ट’ च्यारिटी नाइट २०१८ को आयोजना गर्ने भएको हो।
लण्डनमा पहिलो पटक आयोजना गर्न लागिएको यस कविता कन्सर्टमा कवि पराजुलीको विशेष प्रस्तुतिसहित बेलायत निवासी स्थानीय कवि तथा कवियत्रीबाट पनि कविता वाचन हुने जानकारी आयोजकले दिएका छन्। बेलायतजस्तो धेरै नेपाली बसोबास गर्ने स्थानमा पहिलो पटक कविता वाचन गर्न जान लाग्दा धेरै उत्साही भएको कवि पराजुलीले बताए।
पराजुलीको कविता संग्रह ‘सगरमाथाको गहिराई’ले यस वर्षको पद्मश्री पुरस्कार प्राप्त गरेको थियाे।
