अटोमोबाइल क्षेत्र अहिले विद्युतीय सवारीको युगमा प्रवेश गरेको छ। धेरै देशले पेट्रोल र डिजेलबाट चल्ने गाडीको तुलनामा बिजुली गाडीलाई प्रवर्द्धन गरिरहेका छन्। नेपाल त बिजुली गाडी प्रयोगमा संसारकै अग्रणी स्थानमा पर्छ।
उपभोक्ताको बढ्दो रूचिसँगै संसारभरका कम्पनीले नयाँ नयाँ मोडलका बिजुली गाडी बजारमा ल्याइरहेका छन्। त्यसैमध्ये धेरैको चासो र ध्यान तान्न सफल छ — मोरिस गराज (एमजी) कम्पनीको 'आइएम–६' मोडल।
एमजीको यो प्रिमियम इलेक्ट्रिक 'एसयुभी' गाडीलाई संसारभरका अटो–समीक्षकले टेस्लाको मोडल वाई र मर्सिडिजको 'इक्युसी' जस्ता लक्जरी (आरामदायी) गाडीसँग तुलना गरिरहेका छन्।
आधुनिक डिजाइन, ब्याट्रीको उच्च क्षमता, अत्याधुनिक प्रविधिको प्रयोग र लामो यात्राका लागि उपयुक्त भएकाले नै एमजीको यो मोडल संसारभरि चर्चाको शिखरमा पुगेको हो। यसलाई 'स्मार्ट ड्राइभिङ' को अनुभव गराउने गाडीका रूपमा व्याख्या गरिएको छ।
नेपालका लागि एमजीको आधिकारिक वितरक प्यारामाउन्ट मोटर्सले यो मोडल नेपाली बजारमा ल्याएको हो।
प्यारामाउन्ट मोटर्सका प्रबन्ध निर्देशक शिरिष मुरारकाका अनुसार नेपाली बजारमा यो गाडीको मूल्य ७४ लाख ९९ हजार रूपैयाँ छ।
यो स्टोरीमा हामी एमजी आइएम–६ का विशेषताबारे चर्चा गर्दै छौं।
यो गाडी नेपालको बाटोघाटो र सबै किसिमको मौसमका लागि उपयुक्त रहेको प्यारामाउन्टका प्रबन्ध निर्देशक मुरारका बताउँछन्।
उनले यसो भन्नुका पछाडि पाँच कारण छन् —
पहिलो, यो गाडीको 'टर्निङ रेडियस' ५.०६ मिटर छ। यसको मतलब, साँघुरो बाटोमा पनि सजिलै मोड्न सकिन्छ। यो अंक थोरै छ भने साँघुरो बाटोमा मोड्ने क्षमता बढी हुन्छ। टर्निङ रेडियस धेरै भएको गाडी घुमाउन फराकिलो ठाउँ चाहिन्छ।
त्यही भएर यो गाडी काठमाडौं लगायत सहरी क्षेत्रका साँघुरा बाटामा चलाउन सजिलो हुने मुरारका बताउँछन्।
उनका अनुसार यो ५ देखि ६ मिटर चौडा बाटोमा पनि रिभर्स नगरी घुमाउन मिल्छ। त्योभन्दा ठूलो १० मिटर चौडाइमा त झन् सजिलै घुम्छ।
दोस्रो कारण हो, गाडीको सबभन्दा तल्लो भाग र जमिनको सतहबीच ६.८९ इन्चको अन्तर। यसलाई प्राविधिक भाषामा 'ग्राउन्ड क्लियरेन्स' भनिन्छ।
नेपालको बाटोघाटो एकदमै उबडखाबड छ। ठाउँ–ठाउँमा जोल्टिङहरू आइरहन्छन्। गाडीको तल्लो भाग र जमिनको सतहबीच अन्तर कम छ भने त्यस्तो गाडी उबडखाबडमा हाँक्दा भुइँमा ठोक्किने डर हुन्छ। एमजी आइएम–६ भने सजिलै चलाउन सकिने मुरारका बताउँछन्।
तेस्रो कारण, यो गाडी पानी पर्दा वा हुस्सु लाग्दा पनि चलाउन गाह्रो हुँदैन।
नेपालका विभिन्न मौसममध्ये मनसुन बेला र हिउँदमा हुस्सु लाग्दा अगाडिको दृश्य राम्ररी नदेखेर चालकलाई गाह्रो पर्छ। एमजी आइएम–६ मा भने यस्तै अवस्थाका लागि भनेर ६ वटा क्यामरा जडान गरिएका छन्, जसले गाडी वरिपरिको दृश्य ३६० डिग्रीमा हेर्न मिल्छ।
मुरारकाका अनुसार एउटा क्यामरा गाडीको अगाडि भागमा ग्रिलको ठ्याक्कै तल हुन्छ। दोस्रो क्यामरा गाडीको पछाडि भागमा हुन्छ। त्यस्तै, दायाँ र बायाँ लुकिङ ग्लासमुनि, विन्डसेल्डको ठ्याक्कै माथि र बम्परमा पनि एक-एकवटा क्यामरा राखिएको छ।
'यी क्यामराको मद्दतले एकदमै धेरै पानी परेका बेला वा हुस्सु लागेका बेला पनि गाडी वरिपरिको दृश्य देख्न सकिन्छ,' उनले भने, 'यसले मौसमका कारण दुर्घटनाको जोखिम कम हुन्छ।'
चौथो कारण, गाडीमा भएको 'क्र्याब' मोड।
यसले गाडीलाई छड्के गुडाउन मद्दत गर्छ। साँघुरो ठाउँमा पार्किङ गर्न र साँघुरो बाटोमा हाँक्न यसले सजिलो बनाउँछ। सँगसँगै, साँघुरो घुम्तीमा गाडी मोड्न पनि सजिलो हुन्छ।
र पाँचौं कारण, 'इन्टेलिजेन्ट फोर–ह्विल स्टेयरिङ' प्रणाली।
यो एमजी आइएम–६ गाडीका मुख्य विशेषतामध्ये एक हो। यसले तीव्र गतिमा गाडी चलाउँदा पनि सन्तुलनमा राख्न मद्दत गर्छ।
यो गाडीको अर्को मुख्य विशेषता भनेको 'ड्राइभर मनिटरिङ सिस्टम' हो।
गाडी चलाउँदा चलाउँदै चालकको ध्यान बाटोबाट हटेको अवस्थामा यो सिस्टमले सतर्क गराउँछ। यस निम्ति गाडीमा जडान गरिएका क्यामराले चालकको अनुहार निरन्तर अनुगमन गरिरहेको हुन्छ। चालक निदायो वा अन्यत्र ध्यान दियो भने यो सिस्टमले आवाज वा भाइब्रेसन निकाल्छ।
चालक निदाएर वा चालकले बाटोमा ध्यान नदिएर हुने दुर्घटना कम गर्न यसले मद्दत गर्ने कम्पनीले जनाएको छ।
दुर्घटना पर्दा यात्रुहरूको सुरक्षा निम्ति गाडीमा सातवटा एयरब्याग राखिएका छन्। गाडी कतै ठोक्किँदा वा दुर्घटना पर्दा यी एयरब्याग आफै खुल्छन्। यसले यात्रुको शरीर गाडीको भित्तामा ठोक्किनबाट बचाउँछ।
'दुर्घटना पर्दा यात्रुहरूलाई धेरै चोटपटक लाग्ने भित्तामा ठोक्किएर हो। एयरब्याग राम्रो र बलियो छ भने यस्तो जोखिम कम हुन्छ,' उनले भने।
उनका अनुसार चालक र सँगै बस्ने यात्रुको अगाडि एक-एकवटा एयरब्याग हुन्छ। त्यस्तै, पछाडिका यात्रुको सामुन्ने दुइटा, गाडीको अगाडिदेखि पछाडिसम्म छेउ-छेउमा दुवैतर्फ र चालकको घुँडामा पनि एउटा एयरब्याग हुन्छ।
अब हामी एमजी आइएम–६ को ब्याट्री क्षमता र गतिको कुरा गरौं।
यसको ब्याट्री क्षमता ७५ किलोवाट–घन्टा छ। पूरा चार्ज गर्दा ४५० किलोमिटरसम्म यात्रा गर्न सकिन्छ। यो भनेको काठमाडौंबाट पोखरा पुगेर फर्किन सकिने दुरी हो। यो गाडी २१० किलोमिटर प्रतिघन्टाको गतिमा गुड्न सक्छ।
यसलाई चार्ज गर्न एसी र डिसी दुवै किसिमको चार्जिङ प्रयोग गर्न मिल्छ। डिसी चार्जिङले छिटो चार्ज हुन्छ। यसमा ३० प्रतिशतबाट ८० प्रतिशत चार्ज गर्न २० मिनेट मात्र लाग्छ। यसको ब्याट्रीको आयु करिब १० वर्षको छ।
यो गाडीमा सेल्फ पार्किङ वा आफै पार्किङ हुने सुविधा छ। यसका लागि गाडीले आफ्नो क्यामरा प्रयोग गरेर पार्किङ गर्ने ठाउँ स्क्यान गर्छ। त्यो ठाउँमा गाडी अट्छ कि अट्दैन वा कसरी घुमाउने भनेर गाडीले आफै हेर्छ। त्यसपछि चालकले गाडी पार्क गर्न ब्रेक र स्टेयरिङ मात्र प्रयोग गरे पुग्छ।
यो गाडी ६ वटा रङमा उपलब्ध छन् — कालो, खैरो, सेतो, हल्का गुलाबी, निलो र बेज (फिक्का पहेँलो)।
गाडीको बाहिरी डिजाइन एकदमै स्पोर्टी र कूल छ। पछाडि भागमा पातलो लेड टेललाइट राखिएका छन्, जसले यसलाई आकर्षक देखाउँछ। यसको ढोका खोल्न ह्यान्डल छोए मात्र पुग्छ। सेन्सरले तपाईंको स्पर्स थाहा पाएर ढोका आफै खुल्छ।
गाडीको भित्री भाग पनि आरामदायी छ। प्रविधिको प्रशस्त प्रयोग गरिएको हामी पाउँछौं। यसमा २६.३ इन्चको फराकिलो ड्राइभर डिस्प्ले छ भने १०.५ इन्चको टचस्क्रिन इनफोटेन्मेन्ट राखिएको छ। त्यसबाहेक सिसाको प्यानोरामिक छत, उच्च गुणस्तरको छालाको सिट, प्रिमियम स्पिकर लगायत सुविधा छन्।
गाडीभित्र २५६ वटा रङको लाइट बाल्न सकिन्छ, जसले गाडीलाई भित्रबाट आकर्षक बनाउँछ। यसमा सिसाका दुई तह प्रयोग गरिएकाले भित्रको आवाज बाहिर सुनिँदैन। सँगसँगै, गाडीभित्रको तापक्रम बाहिरको मौसमले प्रभावित हुदैन।
अगाडि र पछाडि गरेर चारवटै ढोकाभित्र पकेट र पानीको बोतल राख्ने ठाउँ छ। चारवटा कप राख्ने ठाउँ पनि छन्। लामो यात्राका लागि खानेकुरा राख्न मिल्ने ठाउँ पनि बनाइएको छ। यसको 'बुटस्पेस' जसलाई पछाडिको डिक्की पनि भनिन्छ, त्यसमा ४१५ लिटर सामान अट्ने ठाउँ छ। यसमा २४ इन्चका तीन–चारवटा सुटकेस सजिलै अट्छन्।
एमजी ब्रान्ड भनेको सन् १९२० दशकमा बेलायतमा सुरू भएको हो। अहिले यो कम्पनी चीनको एसएआइसी मोटर कर्पोरेसनको स्वामित्वमा छ। यो कम्पनीले केही समययता पेट्रोल र डिजेल गाडीको तुलनामा इलेक्ट्रिक गाडीमा प्राथमिकता दिइरहेको छ।
त्यसैमध्ये एक आइएम–६ लाई कम्पनीले पहिलोपटक सन् २०२५ को सुरूआतमा विभिन्न अन्तर्राष्ट्रिय अटो शोहरूमा प्रदर्शनीमा राखेको थियो।
***
यी पनि पढ्नुहोस्:
-1746009348.jpg)
