रेखा थापा निर्मित तथा अभिनीत फिल्म 'उपहार' को चारवटा पोस्टर सार्वजनिक गरिएको छ।
माघे संक्रान्तिको अवसर पारेर निर्माण टिमले फिल्मका चार पोस्टर सार्वजनिक गरेका हुन्। एक पोस्टरमा अभिनेत्री रेखा थापा, पूजा शर्मा, बेनिशा हमाल र मुकुन भुषाललाई स्थान दिइएको छ। चिया घरलाई पृष्ठभूमिमा राखेर बनाइएको पोस्टरमा रेखालाई थर्मस र चियाको ग्लास बोकेको देखाइएको छ भने मुकुन भुषाल ह्विलचेयरमा बसेका छन्।
अर्को पोस्टरमा अभिनेता तेज गिरी र अभिनेत्री बेनिशालाई बेहुलाबेहुलीको लुक्समा देखाइएको छ। जहाँ मुकुन र रेखा तथा समर्पण जंग कार्की र पूजा शर्मालाई पनि अटाइएको छ। त्यस्तै तेस्रो पोस्टर उपहार शैलीमा निर्माण गरिएको छ।
चौथो पोस्टरमा अभिनेता मुकुनलाई ह्विलचेयरमा देखाइँदा रेखा कालो चस्मामा आकर्षक देखिएकी छन्। यो पोस्टरमा फिल्मको गीत 'मुटुको चार आना' मा अभिनय गरेका कलाकार निर्मल शर्मा, शिशिर राणा, राजाराम पौडेल र किरण केसी फिचर्ड छन्।
ज्ञानेन्द्र देउजा निर्देशित फिल्ममा सुष्मा कार्की, अंशु महर्जन, आशा भुुषाललगायत कलाकारको पनि अभिनय छ। अभिनेत्री थापाका श्रीमान् बलराम शाही ठकुरी कार्यकारी निर्माता रहेको फिल्मका निर्माता सुलभ प्रतिक र समीक्षा देउजा हुन्।
रेखा फिल्म्स र कपनगढी फिल्म्सको ब्यानरमा निर्माण भएको फिल्ममा विष्णु कल्पित घिमिरेको छायांकन, अर्जुन पोखरेल र बाबुल गिरीको संगीत, मित्र डि गुरुङको सम्पादन, सुलक्षण भारतीको कथा, भारतीका साथै अभिमन्यू निरवी र माधव शर्माको पटकथा तथा संवाद, अनुपम गौतमको भिएफएक्स र रोशन श्रेष्ठको द्वन्द्व निर्देशन छ।
यो फिल्म फागुन २५ गतेदेखि प्रदर्शन हुनेछ।
