सौरभ चौधरी लिखित तथा निर्देशित फिल्म 'द अन ब्रेकेबल अगस्त्यः च्याप्टर १' को पोस्टर सार्वजनिक गरिएको छ।
मंगलबार सार्वजनिक गरिएको पोस्टरमा अभिनेता नाजिर हुसेनलाई ५ फरक अवतारमा प्रस्तुत गरिएको छ। यसअघि अभिनेता सौगात मल्लको पोस्टर सार्वजनिक गरिएको थियो।
निर्माण टिमका अनुसार यस फिल्मका लागि २० केजी तौल बढाएका थिए। फिल्ममा नाजिरलाई ‘निसान’ पात्रको भूमिकामा देख्न सकिन्छ।
फिल्ममा सौगातसँगै नाजिर हुसेन, मलिका महत, प्रमोद अग्रहरि, विजय बराल, रविन्द्र झालगायत कलाकारको अभिनय छ। फिल्मलाई संजय लामाले छायांकन गरेका हुन्।
डार्क हर्स इन्टरटेन्मेन्ट र सेभेन सिज इन्टरटेन्मेन्टको प्रस्तुतिमा तयार भएको फिल्ममा प्रकाश मल्ल, अनिष तामाङ र विनोद पौडेलको लगानी छ। फिल्मका कार्यकारी निर्माता विश्व गौचन र अभिषेक चौधरी हुन्। फिल्मलाई नेपालभर डिसिएनले वितरण गर्नेछ।
यो फिल्म फागुन १८ गतेदेखि प्रदर्शन हुनेछ।
