अभिनेत्री रेजिना उप्रेती 'मोदिबेनी' बाट अभिनयमा फर्किदैछिन्। उनले करिब ९ वर्षअघि फिल्म 'वरदान' मा अभिनय गरेकी थिइन्।
दुई कार्यकाल कलाकार संघमा उपाध्यक्ष र वरिष्ठ उपाध्यक्ष रही काम गरेकी उनले यस बीचमा केही म्युजिक भिडिओ, विज्ञापन तथा लघु फिल्ममा अभिनय गरिरहेकी थिइन्। हाल फिल्म 'मोदिबेनी' को कार्यशाला भइरहेको छ।
यसै फिल्ममार्फत अमर प्रताप श्रेष्ठले डेब्यू गर्दैछन्। ओजस थिएटरमा दुई वटा नाटकमा प्रमुख भूमिकामा अभिनय गरेका उनले केही विज्ञापन तथा 'प्रितको रित' नामक वेब सिरिजमा अभिनय गरेका छन्।
शंकर कोइरालाले निर्देशन गर्ने फिल्ममा रेजिना र अमरसँगै सरोज खनाल, दिलीप केसी, केकी अधिकारी, कमलमणी नेपाल, जीवन भट्टराई, सरोज अर्याल, अनामिका लामिछाने, स्नेह भट्टराई, लाबिसलगायत कलाकारको अभिनय रहनेछ। फिल्मको कथा आनन्दविक्रम क्षेत्रीले लेखेका हुन्।
डिनेस्ट इन्टरटेनमेन्टको प्रस्तुतिमा बन्ने फिल्ममा दिलिप केसी निर्माता र हरि श्रेष्ठ सह निर्माता रहेका छन्। फिल्ममा उत्सव दाहालको छायांकन, दिपेन्द्र गौतम (माइकल) को प्रोडक्सन डिजाइन, श्याम बरालको मेकअप छ।
यो फिल्मको छायांकन माघ १६ गतेदेखि सुरू हुनेछ।
