फिल्म 'खजुरे ब्रो' को फर्स्टलुक पोस्टर सार्वजनिक गरिएको छ।
निर्माण टिमले शनिबार पोस्टर सार्वजनिक गर्दै फिल्मको प्रदर्शन मिति घोषणा गरेका छन्। यो फिल्म वैशाख २८ गतेदेखि प्रदर्शन हुनेछ।
पूर्वी नेपालमा ‘एथलेटिक्स’ को महाकुम्भ मानिने ‘धरान रन’ को १२ औं संस्करणको अवसरमा धरानबासीलाई साक्षी राख्दै पोस्टर सार्वजनिक गरिएको हो। कार्यक्रममा धरान उपमहानगर पालिकाका मेयर हर्क साम्पाङले आफूले पनि अभिनय गरेको र धरानमा नै छायांकन गरिएको फिल्मले दर्शकको मन जित्ने बताए।
सार्वजनिक पोस्टरमा फिल्मका प्रमुख ४ जना पात्रलाई प्रस्तुत गरिएको छ। पोस्टर डिजाइन रोयल भिमसेनले गरेका हुन्। फिल्म पारिवारिक व्यंग्यात्मक 'लाइट कमेडी' जनरामा आधारित फिल्म हो। फिल्मले धरानको संस्कृतिको प्रवर्द्धन गर्ने र ठूलो पर्दामा स्थानीय कला र रहनसहन झल्काउने निर्माण टिमको भनाइ छ।
सुरज सुनुवारले निर्देशन गरिरहेको फिल्ममा नवीन मानन्धर र सुरज सुनुवारको लगानी छ। कमेडी जनरामा बन्ने फिल्मको लेखक पनि निर्देशक सुनुवार नै हुन्।
दिव्यदृश्य इन्टरटेनटमेन्टको ब्यानरको फिल्ममा रेयर राई, महेश त्रिपाठी, नीति शाह, नविन मानन्धर, प्रकाश भुजेल, बिनिता थापा मगर, सुष्मा निरौला, पुस्कर कार्की, मनिष राउत, प्रेम सुब्बा, शान्तिला तामाङ, सुजाता राईलगायत कलाकारको अभिनय छ। फिल्ममा धरानका मेयर हर्क साम्पाङको पनि अभिनय छ। फिल्ममा उनको विशेष भूमिका छ।
डायमण्ड उप्रेती कार्यकारी निर्माता रहेको फिल्ममा शिशिर विसंखेको छायांकन, अनमोल गुरुङको संगीत रहेको छ।
