फिल्म 'रंगेली' को प्रिमियर शो आयोजना भएको छ।
बुधबार साँझ काठमाडौंको कमलपोखरीस्थित बीग मुभिजमा आयोजना भएको प्रिमियरमा उपस्थित कलाकारले फिल्म रूचाए। प्रिमियरपछि फिल्ममा दयाको ग्याङस्टर चरित्र र मिरूनाको अप्रत्याशित भूमिकाको प्रशंसा भएको थियो।
निर्धारित समयभन्दा केही ढिलो प्रिमियर प्रदर्शन सुरू भएता पनि पत्रकार तथा चलचित्रकर्मीसहित झन्डै चार सय पाहुनाले राती ११ बजेसम्म बसेर 'रंगेली' हेरेका थिए।
प्रिमियरमा फिल्मको क्लाइमेक्सको प्रशंसा भएको थियो। अप्रत्याशित रूपमा अन्त्यमा आउने पात्र (आर्यन सिग्देल) को दमदार केमियोको निकै चर्चा भएको थियो।
अर्जुन सुवेदी लिखित तथा निर्देशित फिल्ममा दया र मिरूनासँगै अर्पण थापा, प्रवीण खतिवडा, रमेश बुढाथोकी, सुन्दर धिताल, रुपेश झालगायत कलाकारको अभिनय छ। फिल्मका गीतहरूमा हर्क साउद, अर्जुन सुवेदी र सबिन एकतारेको शब्द रचना तथा सुशान्त गौतम र हर्कुलस बस्नेतको संगीत रहेको छ।
संसार चौलागाईं र रमेश भट्टराई निर्माता रहेको फिल्ममा युवक कार्की र शिव शंकर चौलागाईं सह निर्माता छन्। फिल्मका कार्यकारी निर्माताहरू जीतेन्द्र खतिवडा र अनुज जंग थापा हुन्। फिल्मलाई सुशन प्रजापतिले छायांकन गरेका छन्।
