शोभित बस्नेत निर्देशित फिल्म 'बद्री बहादुर' गीत सार्वजनिक भएको छ।
सोमबार काठमाडौंमा एक कार्यक्रम आयोजना गर्दै फिल्ममा समावेशी 'पुलिस दाइ' बोलको गीत सार्वजनिक गरिएको हो। सार्वजनिक गीतमा अभिनेत्री पूजा शर्मा, सलोन बस्नेत, जयकिसन बस्नेत, राजिव बस्नेत, छुल्ठिम गुरुङलगायत कलाकारलाई देख्न सकिन्छ। पूजा र सलोन फिल्मको यही गीतमा मात्रै देखिनेछन्।
गीतमा शिवम अधिकारीको शब्द, टंक बुढाथोकीको संगीत तथा संगीतकार बुढाथोकी र मिलन नेवारको स्वर सुन्न सकिन्छ। शिव विकको कोरियोग्राफी रहेको गीतमा विनोद सापकोटाको छायांकन छ।
सञ्चारकर्मी तथा चलचित्र विकास बोर्डका सदस्य रवि अधिकारी कार्यकारी निर्माता रहेको फिल्म एवी पिक्चर्स फार्म र सलोन सलिना फिल्मसको ब्यानरमा निर्माण भएको हो।
विजय गोपाल दली प्रस्तुतकर्ता र मिथुन भोटे फिल्मको निर्मातामा छन्। फिल्ममा जय किसन बस्नेत, एलिना गुरुङ, छुल्ठिम गुरुङ, राजीव जंग बस्नेत, धिरेन शाक्य र वर्षा चौलागाईंलगायत कलाकारको अभिनय छ।
फिल्ममा विनोद सापकोटाको छायांकन, टंक बुढाथोकी र उजन नेम्वाङको संगीत, रामकाजी घिमिरे लेखन, शिव विकको नृत्य निर्देशन, शंकर महर्जनको द्वन्द्व निर्देशन तथा समिर मियाँ सम्पादन छ। आरआर फिल्म्सले वितरण गर्ने फिल्म काठमाडौं, लमजुङ, धरान र संखुवासभा क्षेत्रमा छायांकन गरिएको हो।
यो फिल्म चैत २३ गतेदेखि प्रदर्शन हुँदैछ।
